شال:پہ زور بیگواھیں مردمانی پد جنگ ءَ شدکشیں زھرشانی گدان ءَ 5355 روچ سرجم بوتگ۔ پنچ شمبے ءِ روچ ءَ بی ایس او ءِ بنجاھی رسانکدری کارگشاد پرید مینگل، شال ھنکین ءِ سرکماش زھور ءُ ھمید بنزہ ءِ کمک کارشاد یونس ءُ ادگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ زور بیگواھیں مردمانی کھول ایمنیں زھرشانی ءِ رد ءَ وتی آزیزانی آمیدگس ءَ پیش کنگ ءِ لوٹ ءَ کنگ ءَ اَنت کہ آیانی سر ءَ چونیں میاباری یے سرزد بوت کانود ءِ پارست ءَ سزا دیگ بہ بنت۔ بلے بلوچستان سرکار ءُ زوریں بیگواھی ءِ زمہ وار آیانی توار ءِ گوش دارگ ءَ اَبید زور کارمرز کنگ ءَ اَنت۔
آئی ءَ گوشتگ کہ یات بہ بہ اِت پاکستان ءِ پیشیگین مزن وزیر ءَ زوریں بیگواھی ءِ جیڑہ ءِ بارو ءَ گوشتگ اَت کہ بلوچستان ءَ زور بیگواھیں مردم لشکر ءِ دست ءَ اَنت ءُ پہ آیانی دیم ءَ آرگ ءَ جھد کنگ ءَ ایں۔ بلے چہ ایشی ءَ ابید لاشانی دزکپگ ءُ لاشانی ابید ءِ چار ءُ ٹپاس ءَ بے کس گوشگ ءُ کبر کنگ یک جستے ودی کنت۔ بلوچستان ءِ تھی کارانی وزیر ءَ زور بیگواھیں مردمانی کول دلجمی داتگ اَنت کہ یک ھپتگے ءِ تہ ءَ درسیں زور بیگواھیں مردم دیم ءَ آرگ بنت۔ چہ اے دلجمی دیگ ءَ ابید زوریں بیگواھی ءِ تیز بوگ پہ ادارھانی نابودی ءِ پیش دارگ ءَ بس اِنت۔
ماما کدیر گوں اکوام متھدہ ءَ ھوار درسیں مردمی ھکانی ادارھانی گون ءَ لوٹ کرتگ کہ آبلوچستان ءَ مردمی ھکانی لپاشگ ءِ سر ءَ دلگوش ءَ گور بہ کن اَنت ءُ بلوچستان ءَ مردمی ھکانی لگتمال کنوکیں مردم ءُ ادرھاں جست بہ کن اَنت دانکہ بلوچستان ءَ مردمی ھکانی لگتمال کنگ گر ءُ دار بہ بیت۔
