شال: پہ زور بیگواھیں مردمانی پد جنگ ءَ شدکشین زھرشانی گدان ءَ 5359 روچ سرجم بوتگ۔ آدینگ ءِ روچ ءَ شھید بالاچ مولابکش ءِکھول گدان ءَ ساڑی بوتگ ، جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تراں کرتگ ءُ گوشتگ کہ جنوری 2014 ءَ چہ توتک ءَ سے مچی مانشجاھاں 169 مردم ءِ ژانگولیں لاش دزکپتگ کہ زور بیگواھیں مردمانی بوتگ اَنت۔ چہ آیاں لھتے پجارگ بوتگ ءُ گیشترینانی ھڈ بوتگ اَنت، مردمی ھکانی ادارھاں آیانی چار ءُ ٹپاس کنگ ءِ ھم گوشتگ۔
آئی گوشتگ کہ بلوچستان ءَ اے وھد ءَ ھزارانی کچ ءَ مردم زور بیگواہ اَنت مارا ھمے ترس اِنت کہ گیشتریں مردم درکانودی کشگ بنت ءُ آیاں چیریں جاھے ءَ کبر کن اَنت ءُ آیانی لاشاں جنگلاں چگل دے اَنت۔
ماما کدیر گوشتگ کہ شھید بالاچ ءِ کھول پہ انساپ ءَ داں انوں ریاست ءِ آمیدگس ءَ روگ ءَ اَنت، باند ءَ ھم آمیدگس ءَ پیش بنت، ریاست ءِ نیمگ ءَ کمیشن ءُ پتر جوڑ کنگ بیت بلے پہ زور بیگواھیں مردماں ھچ وڑیں گامگیج زورگ نہ بیت۔ مدام پتر جوڑ کنگ بنت ءُ جھان ءَ ھمے پیش دارگ لوٹ اَنت کہ زوریں بیگواھی ءِ جیڑہ ءَ گیش ءُ گیوار کنگ ءَ اَنت، بلے پہ جھان ءِ رد دیگ ءَ دروگ بندگ ءَ اَنت۔
