کیچ: پاری 23 پروری ءَ مزنبند ءِ کوہ ءَ زورگریں پاکستانی لشکر ءِ ڈرون اُرش ءَ شھید بوتگیں سرمچار کماندار میجر مھمد کریم پنام ملا بھرام، شھید ھزا پنام میرل، شھید لپٹینیٹ تالب پنام کمانچر، شھید جلال پنام برمش، شھید شھزاد پنام چراگ، شھید آسپ پنام جنید، شھید لپٹینٹ منزور پنام کیا ءُ شھید مولابکش پنام گپار ءِ شھیدی سالروچ ءِ درگت ءَ دیوانے برجم دارگ بوتگ۔
اھوالکار ءِ رد ءَ دیوان دوشی برجم دارگ بوتگ کہ مردماں بازیں کچے ءَ بھر زرتگ ءُ راجی شھید ستک شانی ندر کرتگ اَنت ءُ شھیدانی اکسانی دیم ءَ ڈیو بالینتگ۔
یات بہ بہ اِت کہ اے راجی جھدکار ھما وھد ءَ شھید کنگ بوتگ اَنت کہ 22 پروری 2023 ءَ شھید میجر مھمد کریم پنام ملا بھرام ءِ سروکی ءَ نیمروچ ءَ بی ایل ایپ ءِ سرمچاراں کیچ ءِ ھند مند ءَ موکندر ءُ دو کوپ ءِ میان ءَ پاکستانی لشکر ءِ چار گاڑیانی کاروان ءِ سر ءَ گوں راکٹ لانچر ءُ مزنیں سلاھاں اُرش کرتگ ءُ اُرش ءِ آسر ءَ پاکستانی لشکر ءِ ھپت کارمند مرتگ ءُ باز ٹپی بوتگ۔
اُرش ءَ پد بلوچ سرمچار پہ سلامتی درآھگ ءَ سوبین بوتگ ءُ مزن بند ءِ کوھاں شتگ اَنت۔ پاکستانی لشکر ءَ ھمے روچ ءَ لشکرکشی بندات کرتگ ءُ دومی روچ ءِ سھب ءَ سرمچارانی بندرے ءَ گوں جنگی بالگرد ءُ ڈرون اُرش کرتگ۔
