چمن: سیمسر ءَ پاسپورٹ سسٹم ءِ بگیری ءَ گوستگیں چار ماہ اِنت کہ زھرشانی نندانک برجاہ اِنت۔ یک شمبے ءُ دوشمبے ءِ میانی شپ ءَ زھرشانی کنوکیں مردماں وتی زھرشانی دراجکش کرتگ ءُ چمن کارگس ءِ دیم ءَ کنٹینر اوشتارینتگ ءُ پاسپورٹ ءِ کارگس بند کرتگ۔
پاکستانی لشکر ءَ دوشی پاسپورٹ کارگس ءِ دیم ءَ زھرشانی نندانک ءِ سر ءَ بیڑ برتگ ءُ پاسپورٹ کارگس ءِ دیم ءَ کنٹینر دور کرتگ اَنت ءُ پاکستانی لشکر ءَ سادک اچکزھی ءَ ھوار باز مردم دزگیر کرتگ۔
پاکستانی لشکر ءِ اے زوراکی ءِ پژدر ءَ آدگہ سروکاں چمن ءَ تھتگ بند ھرتال کنگ ءِ ھواری ءَ چمن شال شھدگ بند کرتگ۔
زھرشانی کنوکیں مردم پولیس سروگان ءِ کارگس ءِ دیم ءَ زھرشانی ءَ نشتگ اَنت ءُ پاکستانی لشکر ءِ بنجل اِش سنگ جتگ۔ پہ زھرشانی کنوکیں مردمانی گِر ءُ دار کنگ ءَ پاکستانی لشکر ءِ کارمنداں چمی گیس جتگ۔
زھرشانی کنوکیں مردمانی گوشگ اِنت دانکہ سادک اچکزھی ءُ آدگہ مردم یل کنگ نہ بوتگ اَنت ما چمن شال شھدگ ءَ وتی زھرشانی ءَ برجاہ دار ایں۔
