شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5354 روچ سرجم بوتگ۔ دوشمبے ءِ روچ ءَ سیاسی ءُ چاگردی کارکن، مھمد، مھمد ھسن، مھمد یوسپ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ آس ءُ ھون ءِ چھرگ ءَ سیاہ ءُ سھریں رنگانی گون ءَ روچ گوزگ ءَ اَنت۔ بلوچ سیاسی سروک ءُ کارکن، ورنا ءُ شھرمنندانی رتکگیں ھوناں سرکار ءِ بگیری ءَ کینگداری گیش کرتگ۔
آئی ءَ گوشتگ کہ بلوچ کارکنانی زوریں بیگواھی ءَ پد آیانی ژانگولیں لاش دزکپگ ءَ اَنت، سیاسی کارکنانی ناھکیں کوش ءِ بگیری ءَ مردم زھرشانی کنگ ءَ اَنت۔
ماما کدیر گوشتگ کہ بلوچانی دزکپتگیں لاشانی پژدر ءَ چست بوتگیں گھگیری ءِ دارگ ءَ بے سوب بوتگ ءُ بلوچ چکچینی ءَ تیز کنگ ءَ اِنت۔ بلوچستان ءَ روکپتی بنگلہ دیش ءِ وڑ ءَ کنگ بوگ ءَ اِنت، ھما وڑ ءَ بنگالیانی کشت ءُ کوش برجاہ بوتگ بلوچستان ءَ ھما وڑ بوگ ءَ اِنت۔ ھما وڑ ءَ روکپتی پاکستان گوں بنگلہ دیش ءَ مٹ بوتگ بلوچستان ءِ ھما وڑ ءَ بوگ ءِ گمان اِنت۔
