بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانے ءَ گوْشتگ کہ گل ءِ نیمگ ءَ ماتیں زبانانی میان استمانی روچ ءَ ماتی زُبان ءِ نام ءَ یک کتابُکے شِنگ کنگ بیت۔ کتابُک ءِ تہ ءَ زبان ءُ زبان ءِ دیمروئی ءُ پشتہ روگ، بلوچی ءُ براہوئی زبان ءِ آکبت ءِ سر ءَ مواد ھوار اِنت۔
دیمتر ءَ جارکش ءَ گوْشتگ کہ راجی نودربر گل یے ءِ بستار ءَ مئے مدام جھد اِنت کہ بلوچ راج ءِ سیاست، زبان، دود ءُ ربیدگ ءُ پجار ءِ سرءَ املی دروشم ءَ جھد بہ کن ایں۔ ھمے پیم گل ءِ پہ ماتی زباناں جھد یکشلہ برجاھ اِنت۔ ماتی زبانانی میان استمانی روچ ءِ درگت ءَ ادارہ سرجمیں بلوچستان ءَ مراگش اڈ دنت ءُ پسنی ءَ مبارک کازی ءِ نام ءَ مزنیں مراگشے اڈ دنت۔
جارکش ءَ گُڈی ءَ گوْشتگ کہ کتابک 21 پروری ءَ چاپ ءُ شِنگ کنگ بیت ءُ وانوکاں گل ءِ برجاھیں مراگشاں دست کپ ایت۔
