سند: گوستگیں روچ ءَ نسیر آباد ءَ پاکستانی لشکر ءِ جوڑ کرتگیں چیریں ادارھانی کارمندانی تیرگواری ءَ سندی راجدوستیں سروک سائیں استاد ھدایت لوھار لاش مرچی جامشورہ ءِ میتگ سنہ ءَ سند ءِ نامداریں راجدوستیں رھشون سائیں جی ایم سید ءِ گُڈی وابجاہ ءِ نزیک ءَ گلزمین ءِ میار کنگ بوتگ۔
ھدایت لوھار ءِ لاش ءِ ھمراھی ءَ آئی کھول ءَ ھوار سند ءِ سیاسی، چاگردی کارکن ءُ جتائیں بھرگاں سیادی داروگیں مردماں بازیں کچے ءَ بھر زرتگ۔
آئی لاش ءِ برگ ءِ وھد ءِ تامربندے ماں رسانکدر ءَ شنگ بوتگ ھمے گندگ بیت آدگہ مردمانی ھواری ءَ ھدایت لوھار ءِ جنک وائس پار مسنگ پرسنز آپ سند ءِ سروک سسی ءُ سورٹ لوھار ءَ ھم لاش کوپگ داتگ۔
ھدایت لوھار ءِ کوش ءِ بگیری ءَ سند ءِ جتا جتائیں ھند ءُ دمگاں نوابشاہ، ٹنڈو مھمد ھان، کشمور، کند کوٹ، کراچی، ھیدر آباد ءُ نسیر آباد ءَ زھرشانی کنگ بوتگ۔
سندی راجدوستیں گلانی نیمگ ءَ باند ءَ سند ءِ بنجاھی شھر کراچی ءَ ھوار جتا جتائیں ھند ءُ دمگاں زھرشانی کنگ بیت۔
جیۓ سندہ پریڈم موومنٹ ءِ نیمگ ءَ ھدایت لوھار ءِ ناھکیں کوش ءِ پژدر ءَ دہ روچ ءَ پرس دارگ ءِ جار جنگ بوتگ۔
