![](https://zrumbesh.com/wp-content/uploads/2024/02/1000236694-1024x576.jpg)
روکپتی بلوچستان: بلوچی لبزانکی گل چھبار ءِ نیمگ ءَ پنچ شمبے 15 پروری 2024 ءَ بلوچی زبان ءِ نامداریں لَچّہ کار اتا شاد ءِ یات ءَ یک شاھیگانیں دیوانے برجم دارگ بوتگ، اے دیوان ءِ گچینی مھمان چہ رو دراتکی بلوچستان ءَ بلوچی زبان ءِ پٹ پولکار، لچّہ کار، گدار نبیس،آزمانکار،نگدکار ءُ شال زانشتجاہ ءِ استاد ڈاکٹر اے آر داد ءُ ورناھیں لچّہ کار شھمیر دیدگ بوتگ انت۔ اے دیوان سئے بھرانی تہ ءَ برجم دارگ بوت۔ دیوان ءِ جارچین مولابخش رئیسی ءُ زَرگُل بوتگ اَنت۔
دیوان ءِ بندات ءَ میرجان میر ءَ دیوان وش آتک کرتگ ءُ دیوان گوں جُنید ءِ وَشگُٹّی ءَ اتا شاد ءِ دستونکے ءِ دپگال ءَ بِندات کنگ بوتگ۔
اولی بھر گوشتانکی بھر بوتگ، گوشتانکی بھر ءِ تہ ءَ ابدالوھاب ایران نژاد ءَ وتی ھیال اتاشاد ءِ لَچّہ کاری ءِ باندات ءَ درنگاز کرتگ اَنت ءُ وتی گوشتانک ءِ تہ ءَ گوشتگ اتا شاد ءَ بلوچی لچہ کاری ءِ تہ ءَ نوکیں تھر آرتگ۔
دومی گوشتانک دیوان ءِ گچینی مھمان ڈاکٹر اے آرداد ءَ داتگ ءُ یک شَرّیں رنگے ءَ اتا شاد ءِ ازم ءِ باندات ءَ وتی ھیال ءُ لیکھی درنگاز کرتگ اَنت۔
دومی بھر بزاں لچہ کاری بھر بوتگ اے بھر ءِ تہ ءَ اے لچّہ کار مھراب بَرَم، شاہ نور کلمتی،زیور یادگاری، لالو پیشُکانی، اکتر دیدگ،جُنید بلوچ،اے آر رھمان،اُمر جوام دَجی، پاروک پزا،چِنال بلوچ، سد گنج بلوچ، جَنّت بایگان، امام آزاد، منیر نور، ھمید موج، ھسین بھار، آرپ شھم، مستپا واھگ،رپیک شوھاز،یاسر ھوت، باسد ھوت، کَھُدا نورجان پیشینی، سنا ازیزی ءُ شھمیر دیدگ ءَ شئیر ونتگ۔
دیوان ءِ ساز ءُ زیملی بھر ءَ استاد وھید نسب ءَ گوں ھمبراھاں اتاشاد ءِ سئے دستونک جْوانیں رنگے ءَ دیوان ءَ پیش کرتگ۔ اے بھر ءِ ازمگر اے رنگ ءَ بوتگ انت۔ گشندہ استاد وھید نسب،باجہ ءِ سر ءَ ھاشم نسب، تبلہ ءِ سر ءَ شیرجان ءُ شاھد بوتگ اَنت،کنجری ءِ سر ءَ نئیم بوتگ۔
اے دیوان بیگاہ ءِ ادار شش ءَ بندات ءُ شپ ءِ نو ءَ ھلاس بوتگ۔