بلوچ راجی زرمبشت ( بی این ایم ) ءِ رسانکدر ءُ ربیدگی کارگشاد کازی داد مھمد ریھان ءَ سندھ ءِ بیگواھیانی توار نامیں گل ءِ سروک سورٹ لوھار ءُ سسوئی لوھار ءِ پت ھدایت لوھار ءِ کوش ایر جتگ ءُ گْوشتگ کہ اے پرایمنیں جھد ءِ مزد اِنت کہ سندی، بلوچ ءُ پشتوناں رسگ ءَ اِنت۔
آئی ءَ گوشتگ کہ من اے کوش ءَ ایر جن آں ، من اے گرانیں باریگ ءَ وتی گْوھار سسوئی ءُ سورٹ لوھار ءِ ھمدرد آں۔ گوں بلوچ راج ءَ دزبندی کن آں کہ آ اے جھد ءِ تہ ءَ آیاں ھرچ وڑیں کمک بہ کن اَنت ءُ تیوک ءَ یل مہ کن اَنت۔
کازی ریھان ءَ ٹویٹر ءَ اے بارو ءَ نبشتگیں ٹویٹے ءَ اے ویل ءِ سرجمیں پژدر درشان کرتگ ءُ اے ایردستیں راجانی چکچینی ءِ تْرام اتگیں شورے گْوشتگ۔
آئی ءَ گوشتگ کہ مروچی سھب ءَ استاد ھدایت لوھار پاکستانی چیریں واکاں ھما وھد ءَ نشانگ کرتگ ءُ کشتگ کہ وانگجاہ ءَ روگ ءَ اَت۔ آ پاکستانی لشکر ءَ آوار جنگ ءَ پد 17 اپریل 2017 ءَ بہ گر داں جولائی 2019 ءَ زور بیگواہ کرتگ اَت۔ آئی ءِ جنک سسوئی ءُ سورٹ لوھار بلوچانی جنکانی رند ءُ پداں پہ وتی پت ءِ آجوئی ءَ دگاں در کپت اَنت۔ آیاں سندھ ءِ بیگواھانی توار ءِ نام ءَ گلے جوڑ کرت ءُ وتی پت ءِ آجوئی ءَ پد ھم پہ آ دگہ زور بیگواھیں مردمانی آجوئی ءَ جھد ءَ اَنت۔
آئی ءَ وتی درشان ءَ دیمتر ءَ گْوشتگ کہ آیانی پت کہ سند ءِ راجدوستے اَت ءُ وتی راج ءِ درد ئِے مار اتگ اَت کشگ بوتگ۔ اے تیوک ءَ لھتے مردمانی توارانی گٹگیر کنگ نہ اِنت بلکہ چکچینی ءِ مگیمیں شونداتے کہ تھر پہ تھریں رنگے ءَ برجاہ اِنت۔ ایردستیں راجاں چہ آیانی سیاسی ءُ چاگردی پجار ءَ زبھر کنگ، گزرانکی تک ءَ آیاں نزور کنگ ءُ پنجاپ ءِ ایردست کنگ۔
’’ سندی چکچینی ءِ ھمے شور ءِ آماچ اَنت، پیپلز پارٹی ءِ رنگ ءَ آ اود ءَ رمبے ءِ سرکار اِنت کہ تیوک ءَ ھزگار ءُ زمیندارانی ءَ جھگیر اِنت، کہ پس اتگیں دودمان ءُ پدمنتگی ءَ ردوم دنت دانکہ مردم سما ءُ گزرانک ءِ پارست ءَ پدمنتگ بہ بہ اَنت چہ ایشی ءَ آیانی مدامگیں ووٹ پھریز اَنت۔ اے پنجاپ شاھی ءِ شریں بائیوار اَنت پمیشکا پنجاپی لشکر ھم چہ آیاں وش اِنت۔
آئی ءَ گوشتگ ھدایت لوھار ءِ وڑیں مردم پمیشکا پاکستانی لشکر ءَ دوست نہ بہ اَنت کہ آ چکچینی ءِ شوندات ءِ بگیری کن اَنت ءُ سندی پجار ءِ مانشت ءِ لوٹوک اَنت۔