لاھور: بلوچ اسٹوڈنٹس کونسل لاھور ءِ نیمگ ءَ پنجاپ ءِ وانگجاھاں بلوچ نودربرانی تُرسینگ ءُ نودربر پیروز ءُ ڈاکٹر جمیل ءِ آجو نہ بیگ ءِ بگیری ءَ زھرشانی روانکے کشگ بیتگ۔ زھرشانی ءَ جنک ءُ پچکیں نودربراں بازیں کچے ءَ بھر زْرتگ، آیاں زورانسری بیگواھیں مردمانی اکس دست ءَ بیتگ اَنت۔
آیاں پنجاپ زانشتجاھاں بلوچ نودربرانی تُرسینگ ءُ زوراکیں رویشتانی ھلاس کنگ ءِ ھواری ءَ پہ زورانسری بیگواھیں پیروز ءُ ڈاکٹر جمیل کیتران ءِ سلامتی آجوئی ءِ لوٹ کرتگ۔
زورانسری بیگواھیں پیروز ءُ ڈاکٹر جمیل کیتران ءِ درکانودی آوار جنگ ءُ بیگواہ کنگ ءِ بگیری ءَ گوستگیں چنچو ھپتگ اِنت کہ بلوچستان ءَ ھوار آدگہ چنچو جاھاں زھرشانی کنگ برجاہ اِنت۔
بلوچ نودربر پیروز ءِ یل نہ بیگ ءِ بگیری ءَ چہ اے روانک ءَ پیش اسلام آباد ءُ آدگہ شھراں زھرشانی کنگ بیتگ۔ لاھور ءَ زھرشانی کنوکیں مردمانی رد ءَ انگت ءَ پنجاپ ءِ جتاھیں شھراں بلوچ نودربرانی زورانسری بیگواھی ءُ تُرسینگ ءِ وئیل دیم ءَ پیداک اِنت۔
پاکستانی لشکر یک پندلے ءِ رد ءَ بلوچ نودربراں زورانسری بیگواہ کنگ ءُ دروگیں کیس نبیسگ ءَ اَنت۔ اے درکانودی کارے ءُ ناھکیں زوراکی یے، ریاست ءِ ادارھانی ناشرکاری ءَ پدر کنگ ءَ اِنت۔
آئی گوشتگ اِنت کہ بلوچ نودربراں ھوار بلوچستان ءِ ھمک شھر ءَ اے وھد ءَ مردم ریاستی زوراکیانی شکار اَنت۔ چہ بارکان ءَ رسانکدری کارکن ڈاکٹر جمیل ءَ چنچو ماہ اِنت کہ درکانودی آوار جنگ ءَ پد بیگواہ اِنت ءُ آئی کھول گوں اندوھاں دچار اِنت۔
اے ملک ءَ کانود ءُ ھک پہ بلوچاں نہ بیگی گپے۔
آئی ءَ گُڈسر ءَ لوٹ کرتگ ءُ گوشتگ کہ زورانسری بیگواھیں نودر پیروز ءَ ھوار درسیں بیگواھیں مردم دیم ءَ آرگ ءُ آجو کنگ بہ بنت۔ آدگہ نودربرانی تُرسینگ ءُ ھمک روچ ءَ زورانسری بیگواھی ءُ بند کنگ بہ بیت۔
بلوچ نودربراں وانگ ءِ ھک دیگ بہ بیت۔ چہ ھمک روچی زورانسری بیگواھیانی سوب ءَ بلوچ نودر وتی وانگاں یل کنگ ءُ روگ ءَ اَنت۔
بنشون: اھوالکار | اکس: اھوالکار
