بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ءَ نبشتگ کہ بدبھتی ءَ بلوچستان ءَ کشت ءُ کوش ءِ درچ برجاہ اِنت، گشیتر مردم زور بیگواہ کنگ بوگ ءَ اَنت۔
آئی ءَ گوشتگ کہ وھدے مئے زھرشانی 23 نومبر ءَ بندات بوتگ، دھانی کچ ءَ مردم بیگواہ کنگ بوتگ، دسمبر ءُ جنوری ءَ داں اسلام آباد ءَ مئے زھرشانی ءَ ھواریں مردم ترسینگ، زور بیگواہ کنگ ءُ گوں آیاں زوراکی کنگ بوگ ءَ اِنت۔
ڈاکٹر ماہ رنگ ءَ گوشتگ کہ زھرشانی ءَ پد داں انوں دھانی کچ ءَ مردم زور بیگواہ کنگ بوتگ آیانی تہ ءَ بلوچ چکچینی ءِ بگیری ءَ زھرشانی ءَ ھواریں مردم اَنت۔ چہ آیاں گل ھان شکاری، میران شکاری ءُ زاھد ء اکتر مھمد، چہ مستونگ ءَ آمر ھم ھوار اِنت۔
آئی ءَ گوشتگ کہ بدبھتی ءَ اے کشت ءُ کوش ءِ ھال ھم بے تواری ءَ کبر کنگ بوگ ءَ اَنت۔ مردم دزگیر ءُ آیانی سر ءَ دروگیں کیس کنگ بوتگ، چہ ایشی ابید مردم زور بیگواہ کنگ بنت ءُ پد ءَ دروگیں میڑاں کشگ بنت۔
ڈاکٹر ماہ رنگ ءَ انوگیں زوریں بیگواھیانی بارو ءَ گوشتگ ک گچینکاری ءَ پد ڈیھ ءِ سیاست داں پہ واکداری ءَ گِر ءُ چیل اَنت آ مرتگ ءُ بیگواھیں مردمانی کھولانی جاوراں بے سما اَنت۔
