ندن: ڈیرہ بگٹی ءَ ھوار تیوگیں بلوچستان ءَ پاکستانی لشکر ءِ زواکیانی بگیری ءَ بی آر پی ماں لندن ءَ برتانیہ ءِ پارلیمنٹ ءِ دیم ءَ زھرشانی کرتگ۔
زھرشانی ءَ بی آر پی ءِ کادربکش بگٹی، شاکر، آسپ ءُ شبیر ءَ ھوار لندن ءِ جھمنندیں بلوچاں بازیں کچے ءَ بھر زرتگ کہ آیانی تہ ءَ جنین ھم ھوار بیتگ اَنت۔ چہ ایشاں اَبید بی این ایم ءُ ایپ بی ایم ءِ کارکناں ھم بھر زرتگ۔ زھرشانی ءَ بی آر پی ءِ بنجاھی جارکش شیر مھمد ءَ تران کرتگ ءُ گوشتگ کہ ھپتگے ءَ گیش اِنت ڈیرہ بگٹی ءِ جتائیں ھنداں پاکستانی لشکر ءِ زوراکی برجاہ اِنت۔ داں انوں بیست ءُ پنچ مردم لشکر ءَ آوار جنگ ءَ پد بیگواہ کرتگ۔
ھندی مردمانی سدانی کچ ءَ مال ءُ دلوت لشکر ءَ لٹ ءُ پل کرتگ اَنت۔ گنڈوھی ءُ آسریلی ءَ مزنیں کچے ءَ مردم پہ لڈ ءُ بار لاچار کنگ ءَ کرتگ اَنت۔ بی آر پی ءِ جارکش ءَ گوشتگ کہ مستونگ ءُ ھزدار ءَ زور بیگواھیں مردم دروگیں میڑاں شھید کنگ بیتگ اَنت اے اولی وئیل نہ اِنت۔ بلکیں سی ٹی ڈی اے وھد ءَ چیریں ادارھانی جھلی بھرگے جوڑ بیتگ ءُ چیریں ادارھانی دست ءَ زور بیگواہ کنگ بیتگیں مردم سی ٹی ڈی ءِ دروگیں میڑاں شھید کنگ بنت۔ بلے مردمی ھکانی ادارھانی اے وڑیں دردیگیں وئیلاں بارو ءَ بے تواری جستے ودی کنت۔
گوں مردماں تران کنان ءَ بی آر پی ءِ بنجاھی سروک منسور ءَ تران کرتگ ءُ گوشتگ کہ مردمی ھکانی میان استمانی ادارہ ءُ برتانیہ ءِ سرکار ءِ گون ءَ لوٹ کن ایں کہ بلوچستان ءَ برجاھیں پاکستانی لشکر ءِ زوراکیانی بارو ءَ دلگوش ءَ گور بہ کن اَنت۔ بی آر پی لندن ءِ سروک نسار اھمد ءَ گوں رسانکدر ءَ تران کنان ءَ گوشتگ کہ بلوچستان ءَ گوستگیں ھپتاد ءُ پنچ سال اِنت پاکستانی لشکر ءِ زوراکی برجاہ اَنت، بلے بلوچ چہ وتی ھکانی جھد ءَ ھچ وڑ ءَ پدکنز نہ بیت۔
بنشون: درشان | اکس: بی آر پی
