دری رسانکدر، ریڈیو پری یورپ ءُ ریڈیو لبرٹی ءِ نیمگ ءَ گزارشے شنگ کنگ بیتگ ءُ آیانی گْوشگ انت کہ چہ امریکا ءِ سلاھاں تھریک تالبان پاکستان (ٹی ٹی پی) ءُ بلوچ آجوئی لوٹوکیں گل گیشتِر مُھکم بیتگ اَنت۔
گزارش ءِ رد ءَ اوگانستان ءَ پَشت کپتگیں امریکا ءِ سلاہ ءُ سامان ٹی ٹی پی ءُ بلوچ آجوئی لوٹوکانی دست ءَ کپتگ اَنت۔
گزارش ءِ تہ ءَ گْوشگ بیتگ کہ ھما وھد ءَ تالباناں اوگانستان دستیگ کُرتگ گڑا امریکا ءِ لھتیں سلاہ ءُ سامان پاکستان ءَ راہ دیگ بیتگ کہ ھمے سلاہ نوں پاکستان ءِ بگیری ءَ کارمرد کنگ بیگ ءَ اَنت۔
یات بہ بہ اِت کہ سال 2021 ءَ اگست ءِ ماہ ءَ امریکا ءَ اوگانستان یل کُرتگ اَت گڑا امریکا ءِ بازیں سلاہ ءُ سامان کہ کساس 7 ارب ڈالر ءِ بیتگ اَنت، پشت کپتگ اِت اَنت۔
امریکا ءِ روگ ءَ پد اے سلاہ ءُ سامان تالباناں دستیگ کُرتگ اِت اَنت۔
بنشون: جھانی رسانکدر | اکس: دامگ
