چہ بلوچ راج ءَ گچینکاریاں بھر نہ زیرگ ءِ دزبندی
» تئی ووٹ زور بیگواھی ءِ تہ ءَ گیشی ءِ سبب جوڑ بیت
» گوں ووٹ ءُ نوٹ ءِ سیاست ءَ بلوچ راجی سنچ ءِ جڈو کنگ ءِ کوشست کنگ بیت
بلوچ راج ءِ بچ ءُ جنکاں!
زورگریں پاکستانی مھترھند یک برے پد ءَ پہ جھان ءِ رد دیگ ءَ پہ نام گپتیں گچینکاریاں مندر سازگ ءَ اِنت۔انچوش کہ شما سرپد اِت کہ آ بلوچ گلزمین ءِ سر ءَ وتی ناراھیں زورگری ءِ برجاہ دارگ ءَ پہ چوشیں ناھودگیں کارے ءَ باڑا اِنت۔ ناشرکاریں مھترھند ءِ اے بد ءُ ردیں مندر ءِ لھتے من ءُ مول ایش اَنت۔
1۔ جھان ءَ باور کنائینگ بہ بیت کہ بلوچستان زورگپتیں سرڈگارے نہ اِنت۔
2۔ بلوچستان زورگریں پاکستان ءِ نوک آبادی یے نہ اِنت بلکیں راھبندی استانے۔
3۔ بلوچ چہ پاکستانی تْرام ءَ دلجم ءُ وش اَنت۔
4 ۔ کاسگ چٹیں بلوچستان پارلیمان راھبندی ءُ کردانکی بستارے دار ایت۔
5۔ پاکستانی مھترھند کردانکی بستار ءَ برشکستیں مھترھندے کہ آ اود ءَ دگہ ھچ نیست ابید چہ ایشی ءَ کہ ڈیھ پہ واکدارانی مالی سیتاں کارمرد کنگ بیگ ءَ اِنت ءُ اے میارباریں روشت ءَ ما پاکستان ءِ تہ ءَ ھر جاہ گندان ایں، میان استمانی ناشرکاری ءِ رودم جاہ پاکستان لوٹ ایت کہ اے بدبوئیں سیاسی ربیدگ ءَ وتی رودینتگیں پارلیمانی ڈنگ ءُ ٹیکانی پارست ءَ بلوچستان ءِ سر ءَ بہ منڈ ایت، گچینکاری ءِ کسمانک ءِ تہ ءَ شمئے بھر زیرگ اے ناپاکیں شوراں پہ سرجم بیگ ءَ کمک کنت۔
بلوچاں!
پاکستان ءِ کلپیں گچینکاری ءِ تہ ءَ بھر زیرگ ءَ ناں ایوک ءَ میان استمانی تک ءَ بلوچ ءِ سیاسی ، کردانکی ءُ راھبندی جیڑہ نزور بیت بلکیں چہ ایشی ءَ پاکستان ءِ تہ ءَ زیردستیں راجاں ھم ردیں کلوہ سر بیت ، کلپیں گچینکاری ءَ بھر زیرگ ءِ تاوان تیوک ءَ اے نہ بہ اَنت بلکیں ایشی ءِ کشانکی ئیں سان گیشتر ءُ ھمہ گیر اَنت۔
1۔ شمارا چہ بے ستک ءُ بے باوریں مردماں یکے گچین کنگی بیت ءُ گیشتر اے ’گچین ‘ ءَ چہ شمئے ووٹ دیگ ءَ پیش زورگریں پاکستانی لشکر وت کنت ، زورگریں مھترھند ءِ گچین کرتگیں اے مردم تئی جاہ ءَ زورگر ءِ وپادار بیت ءُ تئی روتگاں نزور کنت۔
2۔ تئی ووٹ زور بیگواھی ءِ تہ ءَ گیشی ءِ سبب جوڑ بیت : چہ پاکستانی لشکر ءِ اے کلپیں گچینکاریانی آسر ءَ بلوچستان ءَ زور بیگواھیانی تہ ءَ گیشی کئیت۔پاکستانی پارلیمان ءِ درچتگیں باسک اے بارہ ءَ راھبند سازی ءِ راہ ءَ ڈنگر جن اَنت ءُ انچیں راھبند جوڑ کن اَنت کہ چہ ایشی ءَ پاکستان ءِ لشکر ءُ آئی ءِ چیریں تْرامگیجاں زور بیگواھیانی بارہ ءَ گیشتر واک ءُ توان رس ایت انچوش کہ پیش ءَ چہ پاکستانی پارلیمان ءَ زور بیگواھیانی بل ءِ سر ءَ گپ ءُ تْران کنگ ءِ جاہ ءَ بل ءِ جند گار کنگ بیتگ۔
3۔ تئی ووٹ بلوچ زْرمبشت ، دیمونی ءُ دراجیں جز ءِ بگیر ءَ کارمرد کنگ ءُ بلوچ راج ءِ سر ءَ زورگری ءُ زوراکی ءَ گیش کنت۔
4۔ گوں ووٹ ءُ نوٹ ءِ سیاست ءَ بلوچ راجی سنچ ءِ لوچ کنگ ءِ کوشست کنگ بیت داں بلوچاں پرانکی ئیں سیاسی ءُ چاگردی سرگرمیاں دیر داشت ءُ آیاں گوچلی، ڈو ، ریپ دئی ءُ دو تل ءُ دو پوستی ءِ نیمگ ءَ برت بہ کنت۔
ھمک باسنچیں بلوچ زانت پاکستانی گچینکاری ءُ آئی ءِ راجمستری ءَ چپ ءُ چوٹیں گالارانی پارست ءَ ’’ لنگ ءُ لوچیں راجمستری‘‘ ءِ گمراہ کنوکیں نام دیگ بیت۔راستی ءَ اے مزنیں پندل ءُ ریپے، ھپتاد سال اِنت کہ پاکستان بلوچ راج ءَ رد دیگ ءَ اِنت ءُ چہ اے ریپ ءِ پد ءَ بلوچ ءِ راجیں سیتاں مزنیں تاوان رسگ ءَ اِنت۔
مڑاداریں بلوچاں!
شمئے گْور ءَ باز مردم وش ءُ دلکشیں مسامانی ’گندگیں سند‘ ءَ زیر ایت ءُ کئیت اے مردمانی کچوئیں گْوستانک ءُ انیگیں لجی ئیں کرد ءِ سر ءَ بہ جیڑ اِت۔ دلکشیں مسامانی پژدر ءَ چیریں بدیں واھگ ءَ سرپد بیگ ءِ کوشست بہ کن اِت ، اے ھما مردم اَنت کہ دست اش پوشان کرتگ ءُ تئی گزرانکی ، سیاسی ءُ جند ءِ کشت ءُ کشار ءَ بھر زرتگ، اے کاگدی پوشاکانی تہ ءَ پاکستان ءِ ربال چہ تہ ءَ پس اتگ ءُ گسٹراں مین اَنت ۔اے بد کردیں ربالاں تیوک ءَ رد مہ کن اِت بلکیں گوں ایشاں ھما کرد ءُ کار ءَ بہ کن اِت دگہ برے ھچ دلار ، بے باور ءُ بدکرد ءُ مکار شمئے سیاسی ءُ راجی سنچ ءَ بھائی سرپد بیگ ءِ جرات مہ کنت۔
برات ءُ گھاراں!
زور گر ءُ زورگریں مھترھند ءِ اے مکاری ءُ بدیں کارپد ءَ زانگ ءُ سرپد بیگ ءِ کوشست بہ کن اِت ءُ اے شور ءِ بے سوب کنگ ءَ بلوچ آجوئی جنز ءِ واکانی ھمراھی کن اِت ، شمئے یک ووٹے گوں آ ھزاراں بلوچیں ماتاں دْرو بیت ، کہ آیانی چک اے زوراکیں مھترھند ءَ بیگواہ کرتگ اَنت ، آ جنینانی دل آزاری بیت کہ کم منگہ کنگ بیتگ اَنت ، گوں آ چکاں نامھربانی ءِ درانگازی بیت کہ اے وھد ءَ وتی زور بیگواھیں مات ءُ پتانی شوھاز در پہ در اَنت ءُ آ شھمیرانی ھونانی کم منگھی بیت کہ آ پہ تئی گھتریں باندات ءَ نْدر بیتگ اَنت۔
بلوچ راجی زْرمبشت ( بی این ایم ) مردمانی گل اِنت کہ گوں مردمانی ھمدستی ءَ پہ مردماں آشوبی جنگے کنگ ءَ اِنت۔ اے جنگ چہ بلوچ راج ءِ کمک ءَ بندات بیتگ ءُ گوں راج ءِ کمک ءَ مڑاداریں آسرے ءَ سر بیت ، اے جنگ ءَ ما وتی باز چیز ءُ کس ببا داتگ ءُ گیشتر ببا دیگ ءِ ھاٹیگ ھم دار ایں بلے مارا بلوچ راج ءِ پرستکیں پلہ مرزی ءُ اے جنگ ءَ آیانی ھمراھداری ءِ ببا دیگ ءِ ھاٹیگ نیست ، اے راجی جنگے ، تئی جنگ اِنت ءُ پہ تئی آیوکیں پدریچانی گھتری ءِ جنگ اِنت ، اے جنگ ءَ داں گڈی سوبمندی ءَ بھ اوشتگ ءَ مہ ھل اِت۔
زورگریں مھترھند ءِ کلپیں گچینکاریاں سرجم ءَ بے سوب بہ کن اِت ، آئی ءِ ناپاکیں واھگاں گوں سیاسی ءُ راجی سنچ ءَ بے سوب بہ کن اِت، گچینکاریانی سرجم ءَ بائیکاٹ بہ کن اِت ءُ جھان ءَ اے کلوہ ءَ سر بہ کن اِت کہ بلوچ چیردستی ناں آجوئی لوٹ ایت۔زیردستی ءُ کم منگھی زند ناں بلکیں ایوک ءَ پرمڑائیں راجے ءِ بستار ءَ میان استمان ءَ پہ وت جاھے ءِ واھگدار اِنت۔
بلوچ راجی زْرمبشت ( بی این ایم ) زند ءِ ھمک پر ءَ سیادی داروکیں بلوچاں، مالدار ، مید ، کشاورد ، ساربان ، نودربر ، وکیل ، ڈاکٹر ، اھوالکار ، مزدور ، دکاندارانی پجیگ ءَ راج ءِ جنک ءُ بچاں ھم دزبندی کن ایں کہ آ زورگر ءِ گچینکاریانی سرجم ءَ بائیکاٹ بہ کن اَنت ءُ بلوچ راجی جز ءِ پت ءَ بہ اوشت اَنت۔
شنکگاری تک : بلوچ راجی زْرمبشت ( بی این ایم )
