شھمیر ڈاکٹر منان ءُ آئی ءِ ھمراھی ءَ شھمیر بیتگیں اشرپ ، بابو نوروز ، ھنیپ ءُ ساجد ءِ ھشتمی شھمیری روچ ءِ دم ءُ درگت ءَ 30 جنوری ءَ چہ بی این ایم آوران ۔ مشکے ھنکین ، کیچ۔ گوادر ھنکین ءُ 31 جنوری ءَ بنجاھی تک ءَ یاتگاری مراگش ایر کنگ بیتگ۔
گوں بنجاھی مراگش ءَ تْران کنان بی این ایم ءِ سرکماش ڈاکٹر نسیم ءَ گْوشتگ شھید ڈاکٹرمنان ءَ بلوچ راجی زْرمبشت ( بی این ایم ) ءِ تْرامگ ءَ بنکی کرد پیلو کرتگ۔ آئی ءَ لوٹ اتگ بی این ایم ءِ تہ ءَ ادارہ جوڑ کنگ بہ بیت۔ مروچی اگاں آ زندگ بوتین ءُ بی این ایم ءِ جتائیں ادارہ ئِے پرکاری ءَ دیستین اَنت گڑا چہ درساں گیشتر وشی ھمائی ءَ بیتگ اَت۔ بی این ایم ءِ گْوستانک ءَ داں انیگ ءَ چہ شھید واجہ گلام مھمد ءَ شرتریں چیئرمین ءُ چہ شھید ڈاکٹرمنان ءَ شرتریں کارگشاد نہ بیتگ۔
بلے آئی ءِ گْوشگ اَت بی این ایم لیکھی گلے۔ شھید گلام مھمد، شھید ڈاکٹرمنان ءُ شھید بانک کریمہ بے گمان مزنیں کرد ءِ واھند بیتگ اَنت بلے مارا وتی سْرپانی تہ ءَ چہ اے مردماں ھم مستریں مردم ودی کنگی اِنت۔ آجوئی ءِ پند دْراج اِنت۔ کس دومی ءِ مٹ بیت نہ کنت بلے مارا وتی شھیدانی سسا ءُ لیکہ دیم ءَ برگی اِنت۔ گل ءِ رد ءُ بندانی پابندی کنگی اِنت ءُ جتائٛیں دیدانک گوں وشدلی منگی اَنت۔
چیئرمین ڈاکٹر نسیم ءَ چد ءُ دیم گْوشتگ شھیدانی یات کنگ تیوک ءَ اے نہ اِنت کہ ما ایوک ءَ زبانی آیاں سھریں دْروت نْدر بہ کن ایں بلکیں شھیدانی یات کنگ ایش اِنت کہ ما آیانی لیکہ ءِ سر ءَ کار بہ کن ایں۔
بی این ایم ءِ کستریں کمک سرکماش بابل لتیپ ءَ شھید ڈاکٹرمنان ءُ ھمراہ ستا شانی نْدر کرتگ ءُ گْوشتگ ڈاکٹرمنان ءَ وت ءَ پہ راجی سیاست ءَ تراشتگ اَت۔ آئی ءَ گوں کتاباں مھر اَت ءُ وتی ھمبلاں وانگ ءِ سکین ئِے دات۔ آ سرجمی ءَ گل ءِ پابند اَت۔ وھدے گل ءَ گْوشت کہ نوکری ءَ یلہ بہ دے آئی ءَ نوکری یلہ دات ءُ پہ پارٹی ءَ شپ ءُ روچ کار کرت۔ آئی ءَ وتی زندمان ءَ بازیں درور جوڑ کرت کہ مروچی ھم مئے راھشونی کن اَنت۔ ایشانی تہ ءَ جتائیں دیدانکانی اوپار کنگ ھم ھوار اِنت بلے بگیری کنگ ءِ بزانت اے نہ اِنت کہ ما گوں کسے ءَ کینگ بہ دار ایں۔
بی این ایم ءِ سرکارگشاد دل مراد ءَ گْوشتگ شھید ڈاکٹر منان رنگیں مردمانی شپ ءُ روچ ءِ کوشستانی برورد اِنت کہ مروچی 23 سال اِنت بلوچ زْرمبشت زوراکیں لشکر ءِ دیم ءَ مک اِنت۔ 20 سال پیش ھم دیمونی دیگ بیتگ ، بلوچ راجی جست ھم گوں ھمے تْرندی ءَ ھست اَت بلے زْرمبشت اے جاہ ءَ سر نہ اَت۔اے جست ءِ ریس ءُ پریس اے راستی ءَ دیم ءَ کار ایت کہ آ وھدی سیاسی ادارہ نہ بیتگ۔ اے 23 سال ءِ زْرمبشت پمیشکا گیشتر مگیم اِنت کہ اے زْرمبشت ءَ مردم ھلائینگ ءَ نہ اَنت بلکیں ادارہ اَنت کہ شھید ڈاکٹرمنان رنگیں کارستانی داد اَنت ، آیاں ھمے سنچ ردوم داتگ۔
آئی ءَ گْوشتگ ھمیشی ءِ ھمرد ءَ گْوست ءَ دیدے ھم بیتگ کہ آئی ءَ چہ ادارھانی ارزشت ءَ انکار کرتگ اَت۔ آیاں گلانی جوڑ کنگ ءُ گلانی تہ ءَ کار کنگ ءَ ’رمب پسندی‘ گْوشتگ اَت۔ آیاں گْوشتگ اَت زْرمبشت ءِ تہ ءَ گلاں ارزشت نہ بیت بلکیں مردم ارزشت دار اَنت کہ آیانی پشت ءَ زْرمبشت ھل ایت۔ بلے مروچی آ ھم ھمے آسر ءَ رس اتگ اَنت کہ چہ گل ءَ ابید زْرمبشت ھلائینگ نہ بیت۔ اے شھید ڈاکٹرمنان ءُ آئی ءِ ھمبلانی لیکہ ءِ سوبمندی اِنت۔
چہ آئی ءَ ابید مراگش ءَ مستریں کمک سرکارگشاد کمال ءُ رسانکدر ءُ ربیدگی کارگشاد کازی داد مھمد ریھان ءَ ھم وتی سسایانی درانگازی کرتگ، آیاں گْوشتگ شھید ڈاکٹرمنان جتائیں سیاسی راھشونے اَت ، آئی ءَ ناں ایوک ءَ وانندگیں مردم ءُ نودربرانی تہ ءَ راجی سنچ ءِ ودی کنگ ءَ بنکی کرد پیلو کرتگ بلکیں آئی ءَ بلوچستان ءِ ھمک کوچگاں راجی زْرمبشت ءِ کلوہ سر کرتگ۔ گدان ءَ نندوکیں زالاں ھم سر بیتگ ءُ آیاں زْرمبشت ءِ دوزواہ جوڑ کنگ ءَ سوبمند بیتگ۔آ گوں مردماں دوچار کپتگ ءُ آیاں وتی ھم سیالی ءِ مارشت داتگ ءُ گوں راجی زْرمبشت ءَ ھمگرنچ کرتگ اَنت۔
بنجاھی مراگش ءِ جارچین شھید انور ایڈوکیٹ ھنکین ( کیچ-گوادر) ءِ کمک تْرامکار جیھند بلوچ اَت۔
چہ بنجاھی مراگش ءَ ابید 30 جنوری ءَ بی این ایم شھید راشد ھنکین (آواران۔ مشکے) ءُ شھید انور ایڈوکیٹ ھنکین ( کیچ ۔ گوادر) ءِ نیمگ ءَ ھم یاتگاری مراگش ایر کنگ بیتگ کہ آئٛی ءِ تہ ءَ بی این ایم ءِ مزنیں کمک سرکارگشاد کمال ، رسانکدر ءُ ربیدگی کارگشاد کازی ریھان ، بنجاھی پتر ءِ باسک چیپ اسلم ، ھنکین ءِ کماش استاد مھران، زْرمبش بلوچی ءِ ھالانی شونکار سرباز وپا ، زْرمبش براھوئی ءِ شونکار پرھان، ھنکین ءِ کمک کماش تلار ، ھنکین ءِ کلیتدار میرک ءَ وتی لیکہ درشان کرتگ اَنت ءُ ھنکین ءِ کارگشاد زھرہ ءَ جارچینی کرتگ۔
مراگش ءِ تْران کنوکاں گْوشتگ منان جان وتی سسا ءُ کرد ءِ برورد ءَ مروچی ھم مئے راھشونی کنگ ءَ اِنت۔
دگہ مراگشے بی این ایم شھید انور ایڈوکیٹ ھنکین ( کیچ ۔ گوادر ) ءِ چیردستی ءَ بیتگ اے مراگش ءَ مستریں کمک سرکماش ڈاکٹر جلال ، رسانکدر ءُ ربیدگی کارگشاد کازی داد مھمد ریھان ، بی این ایم ءِ بنجاھی پتر ءِ گْوستگیں باسک مھمد یوسپ ، کیچ گوادر ھنکین ءِ تْرامکار بابا جی آر ، شھید آرپ بنزہ ءِ کارگشاد زینل ، شھید ڈاکٹر حامد بنزہ ءِ کارگشاد ڈاکٹر رھیم ءُ گل ءِ کلانھیں باسک ماما انور ءَ گپ جتگ ، مراگش ءِ پاگواجہ مھمد یوسپ اَت ءُ جارچین ھنکین ءِ کمک تْرامکار جھیند اَت۔
گْوشتانک دیوکان گْوشتگ شھید ڈاکٹرمنان جان ءَ لوٹ اتگ اَت کہ گل ءِ تْرامکاری مدام برجاہ بہ بیت پہ ایشی ءَ آ سرجمیں بلوچستان ءَ شتگ۔آئی ءِ گْوشگ اَت کہ پہ آجوئی ءِ زْرمبشت ءَ وانگ ، رازداری ءُ ایمانداری المی اِنت۔ آئی ءَ مارا سوج داتگ کہ ما وتی جھد ءِ تہ ءَ بھ ترس ءِ آماچ مہ بہ ایں۔
