تربت: آپسر ءِ جتائیں جاھاں پاکستانی لشکر ءِ دست ءَ زور بیگواہ کنگ بوتگیں مردمانی کھولاں زھرشانی ءَ ڈی بلوچ ءَ سی پیک دگ بند کرتگ۔
![](https://zrumbesh.com/wp-content/uploads/2024/02/1000217472-1024x576.jpg)
زھرشانی کنوکیں مردمانی گوشگ اِنت کہ آبد الی ء وژدل جھمنند آپسر 21 مارچ 2023، زریپ ء مھم بکش 9 اگست 2023 ، شئیب ء لیاکت 10 اپریل 2023، ھماد نزیر ء نزیر اھمد 10 اپریل 2023 ءُ آدیل اکبال ء مھمد اکبال ءَ 8 مارچ 2023 ءَ پاکستانی لشکر ءَ آوار جتگ ءُ بیگواہ کرتگ۔
کھولانی گوشگ اِنت ما پیسر ءَ ھم پہ وتی زور بیگواھیں مردمانی آجوئی ءَ زھرشانی کرتگ مارا واکداراں دروگیں دلبڈی داتگ ءُ مئے مردم یل کنگ نہ بوتگ اَنت۔
آیانی گوشگ اِنت دانکہ مئے مردم یل کنگ نہ بنت ما وتی زھرشانی ءَ ھلاس نہ کن ایں۔
یات بہ بہ اِت کہ زور بیگواھیں واھد بکش ءِ کھول ءِ نیمگ ءَ سامی ءَ سی پیک دگ ءَ سے روچ اِنت کہ زھرشانی برجاہ اِنت۔ زھرشانی ءِ سوب ءَ دوئیں نیمگاں گاڑی اوشتاتگ اَنت ءُ مردم سکاجنجالانی دیمپان اَنت۔
![](https://zrumbesh.com/wp-content/uploads/2024/02/1000217473-1024x576.jpg)