بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ آپریشن درہ بولان انگت ءَ گوں سوبمندی ءَ برجاہ اِنت ءُ چل ادار ءِ گوزگ ءَ ابید مچ ءِ شھر ءَ سرجم ءَ بلوچ سرمچارانی دست ءَ اِنت۔
آئی ءَ گوشتگ کہ گوستگیں شپ ءَ چہ سبی ءَ ھژدہ گاڑیانی کاروان مچ ءَ سرمچارانی انگر کرتگیں دژمنیں لشکر ءِ کمک ءَ پترگ ءِ جھد ءَ بوتگ اَنت چہ پیسر ءَ سنگر گپتگیں سرمچارانی یک ٹولی یے ءَ مچ شھر ءِ نزیک ءَ گوکرت ھوٹل ءَ ترندیں ارشاں نشانگ کرتگ اَنت۔
جارکش ءَ گوشتگ کہ دژمنیں لشکر ءِ کاروان ءَ ایپ سی ءَ ابید پولیس، لیویز ءُ باز بکتربند گاڑی ھوار بوتگ۔ سرمچاراں دژمن ءِ کاروان چہ دو نیمگاں گوں راکٹ، مشین گن ءُ آدگہ مزن ءُ وتکاریں سلاھانی گون ءَ نشانگ کرتگ۔ ارش ءِ آسر ءَ کم چہ کم چار دژمنیں کارمند مرتگ ءُ باز ٹپی بوتگ۔ ارش ءَ پد کاروان مچ ءَ پترگ ءَ ابید واتر سبی ءَ شتگ۔
جیھند ءَ گوشتگ کہ مجید برگیڈ ءِ پدائی گوستگیں شپ ءَ پاکستانی لشکر ءِ بنجل ءَ پترتگ اَنت ءُ دژمن ءِ گون ءَ ترندی ءَ مڑگ ءَ اَنت۔ ایشانی سرجمیں ھال زوت رسانکدر ءَ شنگ بنت۔
