شال ءَ پاکستانی پوج ءِ دست ءَ بیگواھیں مھمد سدیک ءِ کھول ءَ پریس کانپرنس کرتگ ءُ گوشتگ کہ ھپت اپریل ءِ شپ ءِ ادار دوازدہ ءَ شال ءِ ھند کلی اسمائیل ءَ پاکستانی پوج ءَ مئے گس ءَ بیڑ برتگ ءُ مھمد سدیک آوار جتگ ءُ بیگواہ کرتگ۔ آئی زوریں بیگواھی ءَ لھتیں روچ ءِ گوزگ ءَ ابید مارا ھچ وڑیں سرپدی دیگ نہ بوتگ کہ آ چون ءُ کج ءَ اِنت کہ چہ ایشی ءَ ما سکا جنجال ایں۔
آئی گوشتگ کہ پاکستان ءِ راھبند ھمک شھری ءَ آئی بنکی ھکاں دنت۔ چونیں ھم شھری یے ءَ ابید چہ کانودی کاروائی ءَ بیگواہ کنگ راھبند ءُ انسانی ھکانی گنتریں لگتمالی اِنت۔
آئی گوشتگ کہ من مھمد سدیک ءِ لوگبانک آں ءُ منی ھک اِنت کہ من ءَ منی جود ءِ بابت ءَ سرپدی دیگ بہ بیت ءُ آ آمیدگس ءَ پیش کنگ بہ بیت۔
آئی گوں سرکار، آمیدگس ءُ آدگہ ادارھاں لوٹ کرتگ ءُ گوشتگ کہ اگاں منی جود ءِ سر ءَ چونیں ھم بھتامے ھست گڑا آ آمیدگس ءَ پیش کنگ بہ بیت۔ اگاں آ بے میار اِنت گڑ ءَ زوت آجو کنگ بہ بیت۔
آئی گوشتگ کہ منی زھگ ھمک روچ جست کن اَنت کہ مئے پت کج ءَ اِنت۔ بلے منی کر ءَ ھچ وڑیں پسہ نیست۔ مئے زند ءِ ھمک ساھت گوں جنجالاں گوزگ ءَ اِنت۔
بنشون: پریس کانپرنس اکس: اھوالکار
