سوئی، پسنی ءُ کردگاپءَ پاکستانی پوجءُ سی ٹی ڈی ءَ بیڑ برتگ ءُ باز مردم آوار جتگ ءُ بیگواہ کرتگ۔
بنشون ءِ رد ءَ ڈیرہ بگٹیءِ ھند سوئیءَ پاکستانی پوج ءُ سی ٹی ڈی ءَ جتائیں وھداں جتا جتائیں جاھاں بیڑ برتگ ءُ باز مردم باز مردم آوار جتگ ءُ بیگواہ کرتگ، ھپت مردم پجارگ بوتگ۔ سی ٹی ڈی ءَ 7 اپریل 2026 ءِ سھب ءَ سوئیءَ مھمد کالونی ءَ بیڑ برتگ ءُ کریم ء رھیم بکش بگٹی آوار جتگءُ بیگواہ کرتگ۔ 9 اپریل 2026 ءَ چہ سوئی شھر ءَ سی ٹی ڈی ءَ سدیک ء نزر الی بگٹی آوار جتگ ءُ بیگواہ کرتگ۔
ھمے وڑ ءَ چہ سوئیءِ پٹ پیڈر ءَ ایپ سی ءَ گلمیر ء الی بگٹی آوار جتگ ءُ بیگواہ کرتگ۔ چہ سوئیءَبگٹی کالونی بازار ءَ پاکستانی پوج ءَ نبی شیر ء جنگیان بگٹی آوار جتگ ءُ بیگواہ کرتگ۔
ھندی بنشون ءِ رد ءَ پاکستانی پوجءُ سی ٹی ڈی ءَ چہ سوئی شھر ءَ دگہ سے مردم آوار جتگ ءُ بیگواہ کرتگ کہ آیانی نام بنی بکش ء مھوت بگٹی، نبی بکش پنام لایوں ء بنا بگٹی، اسامہ پنام نادو ء نیک مھمد بگٹی اِنت۔ اے بیگواھیں سے ئیں مردم بگٹی ءِ ٹک ھبیبانی اَنت۔
گوستگیں سے روچانی میانءَ چہ ھبیبانی ٹک ءَ پنچ مردم آوار جنگ ءُ بیگواہ کنگ بوتگ۔
ھمےوڑ ءَ گودار ءِ ھند پسنی ءَ پاکستانی پوج ءَ بیڑ برتگ ءُ جلیل بلوچ ء یاکوب آوار جتگ ءُ بیگواہ کرتگ۔ جلیل بلوچ ءِ امر چاردہ سال اِنتءُ نودربرے۔ پاکستانی پوج ءَ 11 اپریل 2026 ءِ شپ ءِ دو ءَ گس ءَ بیڑ برتگ ءُ آوار جتگ۔
دومی نیمگ ءَ مستونگ ءِ ھند کردگاپ ءَ پاکستانی پوج ءِ لشکرکشی ءُ زوراکی برجاہ اِنت۔ چہ جتائیں جاھاں پاکستانی پوج ءَ باز مردم آوار جتگ ءُ بیگواہ کرتگ۔ چہ بیگواھیں مردماں یکے ءِ نام گوس بکش سرپرہ اِنت کہ چہ گرگینہ ءَ آوار جنگ بوتگ۔ آئی دگہ یک براتے چہ کردگاپ ءِ ھند کوتل دورائی ءَ پوج ءَ آوار جتگ ءُ بیگواہ کرتگ۔
بنشون: اھوالکار اکس: اھوالکار
