شال ءَ پہ بیگواھیں مردمانی آجوئی ءَ وائس پار بلوچ مسنگ پرسنز ءِ زھرشانی گدان ءَ شال پریس کلب ءِ دیم ءَ6131 روچ سرجم بوتگ۔ مرچی گل ءِ ایگزیکٹو کمیٹی ءِ باسک نیاز مھمد گدان ءَ ساڑی بوتگ۔
وی بی ایم پی ءِ چیئرمین نسر اللہ بلوچ ءَ وتی درشانے ءَ گوشتگ کہ گل ءَ یکشل ءَ ھمے ھال سر بوگ ءَ اِنت کہ چہ بلوچستان ءِ جتائیں ھنداں زور بیگواھیں مردمانی تیرسپتگیں لاش دزکپگ ءَ اَنت۔ من ایشی ایر جن آں۔
آئی ءَ گوشتگ کہ زوریں بیگواھیں مردمانی درکانودی کشگ ءُ آیانی لاشانی چگل دیگ نہ تھنا ڈیھ ءِ کانود بلکیں اسلام ءِ تہ ءَ ھم اے وڑیں در انسانی کار ءِ ھچ وڑیں گنجاھشت نیست۔
نسر اللہ بلوچ ءَ گوشتگ کہ اگاں کسے سرپد بیت چہ اے وڑیں درکانودی گامگیج ءَ ڈیھ ءِ سلامتی بیت گڑا اے مزنیں رد پھمی یے۔ اے وڑیں کار بلوچستان ءِ جاوراں شر کنگ ءِ جاہ ءَ گنتر کنت ءُ ایشی آسر ءَ بلوچستان ءِ مردمانی دلانی تہ ءَ کینگ ودی بیت، اے پہ ڈیھ ءِ سلامتی ءَ شریں پالے نہ اِنت۔
آئی ءَ گوں سرکار ءُ ادارھاں لوٹ کرتگ کہ اے ٹوھیں جیڑہ ءِ سر ءَ دلگوش گور بہ کن اَنت ءُ پہ زور بیگواھیں مردمانی درکانودی کوش ءِ ھلاسی ءَ گامگیج بزور اَنت۔پہ درسیں بیگواھیں مردمانی آجوئی ءَ دلجمی دیگ بہ بیت، اگاں کسے ءِ سر ءَ بھتام ھست گڑا آمیدگس ءَ پیش کنگ بہ بیت۔ اگاں کسے میاربار اِنت گڑا آئی ءَ آمیدگس سزا بہ دنت۔
بنشون: درشان اکس: وی بی ایم پی
