شال: سی ٹی ڈی ءِ دست ءَ زوربیگواھیں سیپ اللہ بلوچ ءِ کھول ءَ وتی درشانے ءَ گوشتگ کہ سیپ اللہ بلوچ سی ٹی ڈی ءَ دوازدہ مارچ ءِ شپ ءَ آئی سنگتانی دیم ءَ درکانودی آوار جتگ ءُ بیگواہ کرتگ۔ مئے ایپ آئی آر ھم نبشتہ کنگ نہ بوتگ۔
آئی گوشتگ کہ ما پہ آئی ءِ آجوئی ءَ ھر پیمیں جھد کرتگ۔بلے 31 مارچ ءَ آ ھدہ زندان ءَ برگ بوتگ ءُ مارا آدینگ ءِ روچ ءَ سَے اپریل ءَ ھال دیگ بوتگ کہ آ زندان ءَ بندیگ اِنت۔
آئی گوشتگ کہ راستی ھمیش اِنت زوربیگواھی ءِ یک کانودی دروشمے ءِ دیگ ءِ جھد اِنت۔ اود ءَ ابید چہ کیس ءُ ایپ آئی آر ءَ یک مردمے کم چہ کم سَے ماہ بند کنگ بیت۔ آ نہ سرجم ءَ گوں بیگواھی ءَ ھوار بیت ءُ نیکہ آ آجو اِنت۔
آئی گوشتگ کہ مارا ھمے گوشگ بوتگ شمارا جون ءَ ھال دیگ بنت کہ آئی سر ءَ چے کیس جنگ بوتگ۔ اے کجام انساپ اِنت کہ پیسر ءَ کسے آوار جنگ بیت ءُ لھتیں ماہ ءَ پد اے پیسلہ کنگ بیت کہ آئی سر ءَ چے بھتام جنگی اِنت۔ اگاں کسے ءِ سر ءَ میارے ھست گڑا آ زوت آمیدگس ءَ پیش کنگ بہ بیت۔
آئی گوشتگ کہ اے درمیان ءَ سیپ اللہ جانی، سسائی آزار دیگ بوتگ ءُ آئی ءَ اے ھم گوشگ بوتگ کہ تئی کھول ترا وتی مردم کنگ ءَ نہ اِنت اے یک ٹوھیں سسائی آزارے۔ آئی بے میار ءَ بندیگ کنگ ءَ ما ھما کچ ءَ گمیگ ایں کہ انچوش آئی برگ ءِ وھد ءَ بوتگ ایں۔ آئی بندیگ کنگ ھمے راستی ءَ پیش دار ایت کہ زوریں بیگواھی یک درکانودی کارے ءُ آئی ءَ کانودی دروشمے دیگ ءُ اے زوراکی ءَ دراجکش کنگ ءَ اَنت۔
آئی گوشتگ کہ ما داں وتی براس ءِ آجوئی ءَ جھد ءَ برجاہ داریں۔
بنشون: درشان اکس: کھول
