بلوچ یونائیٹڈ آرمی ءِ جارکش مزار بلوچ ءَ وتی درشان ءَ گوشتگ کہ یو بی اے ءِ سرمچارانی دوشی چار اپریل ءَ کچی ءِ ھند سنی ءَ ترّ ءُ گردے ءِ میان ءَ گوں کشندہ ٹولی ءِ سروک پرید رئیسانی ءِ کارمنداں دیم پہ دیمی میڑے بوتگ کہ ایشی آسر ءَ دو کارمند ازیز جتوئی ءُ نواب جتوئی ء مھمد اشرپ جتوئی جاھی مرتگ اَنت ءُ آیانی سلاہ ھم زرتگ اَنت۔ اے مردماں باز سال اِنت کہ پہ پاکستانی چیریں ادارھانی جوڑ کرتگیں کشندہ ءَ کار ءَ بوتگ اَنت۔ چہ ایشی پیش ھم بلوچ سرمچاراں ازیز ءُ نواب گوں ترندی ءَ کڈن کرتگ اَت۔ بلے آ شر نہ بوتگ اَنت ءُ یکشل ءَ بلوچ آجوئی لوٹوکیں سرمچارانی چاریگی ءُ رندگیری کنگ ءَ ابید ھمے ھند ءَ لس شھری ءُ بلوچ ورنایانی دزگیری ءَ ھوار بوتگ اَنت۔
آئی ءَ گوشتگ کہ ازیز ءُ نواب جتوئی ءُ آیانی وڑیں آدگہ کارمندانی چاریگی ءِ سوب ءَ گوست ءَ باز بلوچ ورنا دژمنیں ادارھانی دست ءَ تاوان بوتگ۔
جارکش ءَ گوشتگ کہ کچی ءَ اے وھد ءَ باز مردم پہ پاکستانی چیریں ادارھاں کار کنگ ءَ اِنت، لھتیں بے زرد پہ لھتیں زراں گوں وتی راج ءَ راجدروھی کنگ ءَ اَنت، ما درسیں ناشرکاراں گوں ترندی ءَ کڈن کن ایں کہ آ زورگریں ریاست ءِ دلالی ءُ چوکی ءُ ریاستی درسیں ادارھاں دور بہ بنت، اگاں نہ وتی جان ءُ مال ءِ تاوان ءِ زمہ وار وت اَنت۔
مزار بلوچ ءَ گوشتگ کہ درسیں کارمندانی بابت ءَ سرپد ایں کہ آ گوں زورگریں ریاست ءَ گوں اَنت، آ دیم ءَ سرمچارانی نشانگ ءَ بنت گوں راجی دلاراں ھچ نرمی کنگ نہ بیت۔
بنشون: درشان اکس: زرمبش