تربت ءِ ھند چہ جوسک ءَ کریم بلوچ نامیں ورنایے آوار جنگ ءُ بیگواہ کنگ بوتگ۔
اھوالکار ءِ رد ءَ زور بیگواھیں کریم بلوچ ء رشید پنجگور ءِ ھند پروم لیگورک ءِ جاہ منند اِنت ءُ ڈرائیورے۔ آ چہ سیمسر ءَ تیل کشگ ءُ وتی کھول ءَ والینگ ءَ بوتگ کہ 2 اپریل 2026 ءَ گاڑی سواریں سلاہ بندیں مردماں آوار جتگ ءُ گوں وت برتگ۔
کریم بلوچ ءِ آوار جنوکانی بابت ءَ ھمے گوشگ بیت کہ ریاستی کشندہ ٹولی ءِ کارمند اَنت۔
آئی زوریں بیگواھی ءِ گپ بی این ایم ءِ انسانی ھکانی ادارہ پانک ءَ راست کرتگ ءُ گوشتگ کہ آئی آوار جنگ ءِ وھد ءَ کریم بلوچ ءِ کستریں برات ھم ساڑی بوتگ۔ آئی آوار جنوک چار مردم بوتگ اَنت کہ آیاں کریم بلوچ ءِ پجار کارڈ چارتگ ءُ پد ءَ آوار جتگ ءُ گوں وت برتگ۔
پانک ءَ کریم بلوچ ءِ آوار جنی ایر جتگ ءُ گوشتگ کہ اے انسانی ھکانی لگتمالی اِنت۔
بنشون: پانک اکس: پانک
