شال: پہ زوربیگواھیں مردمانی پدجنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6115 روچ سرجم بوتگ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ جتائیں بھرگاں سیادی داروکیں مردم گدان ءَ آتکگ اَنت ءُ گوں بیگواھیں مردمانی کھولاں ھمدردی درشان کرتگ۔ گل ءِ سروک گلام پاروک ھم ساڑی بوتگ۔
گلام پاروک ءَ تران کرتگ ءُ گوشتگ کہ پہ زوریں بیگواھیانی گِر ءُ دار کنگ ءَ بیگواھیں مردمانی کھول گوں منانکانی ھواری ءَ دیم ءَ بیا اَنت۔ چی ءَ کہ کھولاں ابید چونیں ھم زوربیگواھیں مردمے ءِ کیس نہ ڈیھ ءُ نہ جھان ءَ منگ بیت۔
آئی گوں بیگواھیں مردمانی کھولاں لوٹ کرتگ کہ آ بے توار مہ بنت بلکیں پہ وتی آزیزانی سلامتی آجوئی ءُ زوریں بیگواھی ءِ ھلاس کنگ ءَ گوں منانک ءَ دیم ءَ بیا اَنت۔
گلام پاروک ءَ گوں سیاسی ٹولی، نودربر گل ءُ جتائیں بھرگاں سیادی داروکیں مردماں لوٹ کرتگ کہ آ بیگواھیں مردمانی کھولاں گوں منانکاں دیم ءَ آرگ ءَ وتی کرد ءَ پیلو بہ کن اَنت۔
بنشون: درشان اکس: وی بی ایم پی
