بلوچ اسٹوڈنٹس ایکش کمیٹی (بساک) ءِ جارکش ءَ وتی درشانے ءَ گوشتگ کہ بلوچستان ءَ چہ سالاں وانگجاہ وھد وھد ءِ سر ءَ بند کنگ بوتگ اَنت، داں مرچی ھم آیانی بندی ءِ دلجمیں نیمونے پیش کنگ نہ بوتگ۔ برے یونیورسٹیانی زر نہ دیگ ءُ استادانی پگارانی جیڑہ ءِ نیمون ءَ بند کنگ بوتگ اَنت، برے پہ شر کنگ ءِ نام ءَ داں ماھاں بند کنگ بنت۔ چہ ایشی نودربر وانگ ءِ بنکی ھکاں زبھر کنگ بوگ ءَ اَنت۔
آئی گوشتگ کہ انوگیں جاور ھمیش اَنت کہ گرمیں دمگانی وانگجاہ یک ماھے ءَ گیش اِنت کہ بند اَنت۔ وھدے کہ سارتیں دمگانی گوستگیں چار ماہ اِنت کہ بند اَنت۔ بلوچستان ءَ پہ وانگ ءَ ٹوھیں ٹاپار جنگ بنت بلے زمینی راستی ھمیش اَنت کہ بدگمانی ءُ وتسری ءَ زانشتی کار تباہ کرتگ اَنت۔ اود ءَ یک نیمگے نوکیں دور ءِ گپ بوگ ءَ اَنت ءُ دومی نیمگ ءَ بلوچستان ءِ ھزارانی کچ ءَ وانگجاھاں آسراتی نیست۔
آئی گوشتگ کہ انوں ھمے ھال اِنت کہ گوستگیں ماھے ءَ بے سوب ءَ یکشل ءَ موکل ءِ نوٹیپکیشن شنگ کنگ بوگ ءَ اَنت۔ چہ ایشی ءَ نودربر سکا سسائی جنجالانی دیمپان اَنت۔ ما ھمے سرپد بہ ایں کہ اے درسیں پیسلہ یک پندلے ءِ رد ءَ کنگ بوگ ءَ اَنت دانکہ بلوچستان ءِ نودربر سسائی پدمنتگی ءِ دیمپان کنگ بہ بنت ءُ وانگی نزام ءَ پہ زانت تاوان دیگ اِنت۔ نودربر گلے ءِ بستار ءَ ما وانگی ادارھانی اے بے بنیادیں بندی ءِ سر ءَ بژن درشان کن این ءُ گوں سرکار ءُ وانگی ادارھاں لوٹ کن ایں کہ وانگی ادارہ زوت پچ کنگ بہ بنت ءُ وانینگ بندات کنگ بہ بیت۔ نودربرانی زند گیش زوال کنگ مہ بیت۔
