بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ بی وائی سی ءِ سروک گوستگیں شش ماہ اِنت پہ زانت وھد ءِ گیش کنگ ءِ دیمپان اَنت۔ چہ ایشی سوب ءَ سروکانی درکانودی بندیگی یکشل ءَ گیش کنگ بوگ ءَ اَنت۔
آئی ءَ گوشتگ کہ گل ءِ بنجاھی سروک ڈاکٹر ماہ رنگ بلوچ، بیبگر بلوچ،سبگت اللہ شاہ جی، بیبوبلوچ ءُ گلزادی بلوچ دراجکشیں ریمانڈ ءَ پد ھدہ زندان شال ءَ دیم دیگ بیتگ اَنت۔ اود ءَ آ آمیدگس ءِ ریمانڈ ءَ بندیگ اَنت۔ چہ سی ٹی ڈی ءِ پرمان ءَ ابید انگت ءَ رپورٹ یاداشتگ کنگ نہ بیتگ۔
جارکش ءَ گوشتگ کہ چہ آمیدگس ءِ نیمگ ءَ رپورٹ ءِیاداشت کنگ ءِوھد ءِمدام گیش کنگ ءَ ھمے گندگ بوگ ءَ اِنت آمیدگس ءُ ریاستی ادارہ یک مھکمیں شوربندی یے ءِ بنیاد ءَ بی وائی سی ءِ سروکانی کیس ءَ پہ زانت وھد دیگ ءَ اَنت دانکہ سروکاں داں بازیں وھد ءَ بندیگ بہ کن اَنت۔
آئی ءَ گوں اکوام متھدہ، میان استمانی انسانی ھکانی گل ءُ گوں سول سوسائٹی ءَ لوٹ کرتگ کہ آ زوت بی وائی سی ء ِ سروکانی درکانودی بندیگی ءُ انسانی ھکانی بگیریانی سر ءَ دلگوش ءَ گور بہ کن اَنت ءُ پاکستان سرکارءَ زور بہ دے اَنت کہ آ میان استمانی کانود ءِ ردءَ آیاں آسراتی بہ دنت ءُ کانود ءِ رد ءَ بنیادی ھکانی دلجمی ءَ بہ دنت۔
