جنیوا ءَ بلوچ نیشنل موومنٹ ( بی این ایم ) ءِ باسک مھرہ بلوچ ءَ اکوام متھدہ ءِ انسانی ھکانی کونسل ءِ شست ءُ یکمی دیوانءَ بلوچستانءَ انسانی ھکانی لگتمالیانی سر ءَ گپ جتگ۔
آئیءَ برجاھیں زوریں بیگواھی، درکانودی کوش ءُ پاکستان سرکارءِ نیمگ ءَ سیاسی کارکنانی نشانگ کنگ ءِ بابت ءَ دلگوش داتگ ءُ میان استمانی تک زور داتگ کہ آ اے ناگیگیں جاورانی سر ءَ زوت دلگوش بدے اَنت ءُ پہ جست گرگءُ انسانی ھکانی پھازداری ءَ گامگیج بزور اَنت۔
مھرہ بلوچ ءَگوشتگ کہ بلوچستانءَ یک سرجمیں راجے ءَ آئی ھستمان ءِ سزادیگ بوگ ءَ اِنت۔ناشرکاریءِ گر ءُ دار ءِ نام ءَ پاکستان ریاست کانود ءَ چو سلاہ ءِ وڑ ءَ کار گرگ ءَ اِنت۔ ایرادگریاں میارے لیکگ ءَ اِنت، مردماں کشگ ءُ سرجمیں راجے ءَ بے توار کنگ ءَ اِنت۔
آئی ءَ گوشتگ کہ بی این ایم ءِ انسانی ھکانی ادارہ پانک ءِ رد ءَ تھنا 2025 ءَ 1355 مردم زور بیگواہ کنگ ءُ 225 مردم درکانودی کشگ بوتگ۔ اے انگت ءَ سرجمیں کچ نہ اَنت۔ چہ گساں مردم آوار جنگ بوگ ءَ اَںت، نودربر چہ وانگجاھاں آوار جنگ ءُ پد ءَ آیانی لاش چگل دیگ بنت۔
مھرہ بلوچ ءَ گوشتگ کہ ڈاکٹر ماہ رنگ بلوچ کہ آ نوبیل انام ءَ نامینگ بوتگ، درکانودی دزگیر کنگ بوتگ، آ چہ آسراتیاں زبھر اَنت۔ آ پمشکا نشانگ کنگ بوتگ اَنت کہ آیاں پر ایمنیں جھد کرتگ۔ دامگ بند کنگ بوتگ اَنت ءُ گوں مردماں زوراکی کنگ ءَ اَنت دانکہ بلوچستان ءِ زوراکیاں جھان سرپد مہ بیت۔
آئی ءَ گوشتگ کہ ما ھمے لوٹ ءَ کن ایں کہ پاکستان ءِ زوراکی گر ءُ دار کنگ بہ بنت، درسیں دزگیر کنگ بوتگیں کارکن یل کنگ بہ بنت، زوریں بیگواھی ءُ درکانودی کوشانی بابت ءَ شریں وڑے ءَ پٹ ءُ پول کنگ بہ بیت۔
بنشون: درشان اکس: بی این ایم
