بلوچ یکجھتی کمیٹی ءِ سروک ڈاکٹر سبیہ بلوچ ءَ وتی درشانے ءَ گوشتگ کہ پرزانہ زھری یک دسمبر 2025 ءَ زوربیگواہ کنگ بوتگ۔ آئی کیس راجی ءُ جھانی تک ءَ چست کنگ بوتگ۔ ما یکشل ءَ ھمے گوشتگ کہ زوربیگواھی تھنا درکانودی گامگیجے نہ اِنت بلکیں چو سلاہ ءِ وڑ ءَ کارمرز کنگ بوگ ءَ اِنت۔ انوگیں جاور ھے پیش دار اَنت کہ چوں یک نادزرسیں زالبولے ءِ زوربیگواہ کنگ ءُ رند ءَ آئی بگیری ءَ رسانکدر ءَ پندل بندات کنگ بوتگ۔
آئی گوشتگ کہ ما اے ھم گوشتگ کہ کجام مردم کہ چہ جنگ ءَ نپ زور اَنت آ چہ پرایمنیں سیاسی جھد ءَ ترس اَنت۔ مرچی منی بگیری ءَ گپ جنگ ھے راستی پیش دار ایت۔ من یک پرایمن ءُ سیاسی کارکنے آں ءُ منی بگیری ءَ برجاھیں مھم نہ تھنا منی پجار ءِ تاوان دیگ ءِ جھدے بلکیں منی بے توار کنگ ءِ پندلے جوڑ کنگ بوگ ءَ اِنت۔
آئی گوشتگ کہ منی کھول یکشل ءَ ترسینگ بوگ ءَ اِنت، منی سنگتاں سسائی زوراکی ءِ دیمپان کنگ ءَ اَنت۔ مئے گل ءِ پنچ سنگت چہ منانک ءُ میار ءَ ابید گوستگیں یک سالے بیت بندیگ اَنت۔
ڈاکٹر سبیہ بلوچ ءَ گوشتگ کہ اے جیڑہ تھنا منی جند یا گوں مئے گل ءَ بندوک نہ اِنت۔ اے ھما ٹوھیں بھتامانی ءُ میارانی چیر دیگ ءِ جھد اِنت کہ دراجیں مدتے بیت بلوچ آئی دیمپانی ءَ کنگ ءَ اِنت۔ اے بے تواری ءِ پشت ءَ برجاھیں زوراکی ءُ مچی سزا ءِ درچ ءِ برجاہ دارگ ءِ جھد اِنت۔
آئی گوشتگ کہ اگاں ریاست اے سرپد بیت منی بگیری ءَ دروگیں بھتام ءُ رسانکدر ءِ پندل ءِ سر ءَ منی سیاسی توار دارگ بیت یا من چہ بیھار دیگ ءُ بے توار باں گڑا اے ریاست ءُ آئی جنگی نپ وارانی وھم اِنت۔ من یک سیاسی کارکنے آن ءُ من بلوچ چکچینی ءُ بلوچستان ءَ انسانی ھکانی لگتمالیانی بگیری ءَ توار چست کن آں۔ منی بگیری ءَ رسانکدر ءَ پندل سازی ءِ مھم ءَ من ءَ ھچ وڑ ءَ بے توار کرت نہ کنت۔
ڈاکٹر سبیہ بلوچ ءَ گوشتگ کہ زالبولے ءِ زوربیگواھی ءُ آئی بگیری ءَ رسانکدری پندل ءُ یک پرایمنیں سیاسی کارکنے ءِ بگیری ءَ درشان دیگ ءِ وڑیں گامگیج ءَ ایرجن آں۔ چہ ایشی بے توار کرت نہ کن اَنت۔
آئی گوشتگ کہ ما گوں درسیں زانتکاریں مردم، سول سوسائٹی، انسانی ھکانی کارکن ءُ رسانکدر ءَ لوٹ کن ایں کہ آ اے رویشت ءِ بگیری ءَ توار چست بہ کن اَنت۔
بنشون: درشان اکس: دامگ
