بلوچ اسٹوڈنٹس آرگنائزیشن آزاد ءِ جارکش شولان بلوچءَ وتی درشانءَ گوشتگ کہ بی ایس او آزاد ءِ پیشگیں چیئرمین زاھد بلوچ ءُ بنجاھی جونیئر جوائنٹ سیکٹری 18 مارچ 2014 ءَ چہ شال ءِ ھند سیٹلائٹ ٹاؤن ءَ درکانودی آوار جنگ ءُ بیگواہ کنگ بوتگ اَنت، آیانی چم دیستگیں گواہ گل ءِ پیشیگیں چیئرپرسن شھید بانک کریمہ بوتگ کہ آ پاکستان ریاست ءَ ٹورنٹو ءَ شھید کرتگ۔ گوستگیں دوازدہ سال اِنت کہ نہ آ دیم ءَ آرگ بنت ءُ نہ آیانی دزگیری پدر کنگ بیت، اے پاکستان ریاست ءِ نیمگ ءَ پرایمنیں سیاسی کارکنانی زوریں بیگواھی ءُ بلوچستان ءَ سیاسی توارانی دارگ ءِ زوراکی ءِ پالیسیانی درچ اِنت۔
آئی ءَ گوشتگ کہ آیانی زوریں بیگواھی ءِ بگیری ءَ گل ءَ ھما سال ءَ کراچی پریس کلب ءِ دیم ءَ داں مرگ شدکشیں ھرتال بندات کرتگ آئی سروکی بانک کریمہ کرتگ ءُ لتیپ جوھر داں چل ءُ شش روچ ءَ شد کشیں ھرتال ءَ نشتگ۔ آ وھد ءَ سرکاری جھگیر ءُ انسانی ھکانی گلانی نیمگ ءَ پہ آیانی آجوئی ءَ دلجمی دیگ بوتگ چہ ایشی ءَ پد گل ءَ داں مرگ شدکشیں زھرشانی گدان ھلاس کرتگ۔ بلے دوازدہ سال ءِ گوزگ ءَ ابید نہ آ دیم ءَ آرگ بوتگ اَنت ءُ نہ آیانی بابت ءَ سرپدی دیگ بوتگ۔
جارکش ءَ گوشتگ کہ چہ ایشی ءَ پد گل ءُ آیانی کھولانی نیمگ ءَ یکشل ءَ زھرشانی ءُ مھم برجاہ دارگ بوتگ، بلے پاکستان ریاست نہ تھنا اے میارباری ءَ بےتوار بوتگ بلکیں مچی سزا ءِ پالیسی ءَ پاری زاھد بلوچ ءِ برات شاہ جان بلوچ آئی جند ءِ ھنکین نال، ھزدار ءَ ناھک ءَ شھید کرتگ۔
آئی ءَ گوشتگ کہ زاھد بلوچ ءُ اسد بلوچ گل ءِ بنجاھی سروک اَنت ءُ بلوچستان ءَ پرایمنیں سیاسی جھد ءَ سرگرم بوتگ اَنت۔ چیئرمین زاھد بلوچ ءَ بلوچ ورنایانی تہ ءَ سیاسی زانشت ودی کنگ ءَ مزنیں کردے پیلو کرتگ، آ بلوچستان ءَ زورگریں ریاست ءِ زوراکیانی بگیری ءَ ترندیں توار ءُ مردمے اِنت آ بلوچ ورنایاں ھوار بلوچ مھلوک ءِ تہ ءَ نامدار بوتگ۔
جارکش ءَ گوشتگ کہ گل ءِ سروک چیئرمین زاھد بلوچ ءُ اسد بلوچ ءَ آیانی سیاسی جھد ءُ مھلوک ءِ تہ ءَ نامداری ءِ پژدر ءَ پاکستان ریاست ءَ بیگواہ کرتگ اَنت دانکہ آ بی ایس او آزاد ءَ نزور بہ کنت ءُ بلوچستان ءَ وتی ناھکیں زورگپتی ءَ برجاہ بدار ایت۔ بلے گل ءِ چیئرمین زاھد بلوچ ءِ لیکہ نہ تھنا مرچی برجاہ اِنت بلکیں گیشتر نامدار ءُ توانمند بوتگ ءُ مھلوک ءِ رھشونی ءَ کنگ ءَ اِنت۔
بنشون: درشان اکس: مونوگرام
