بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ پروری 2026 ءِ ماھی رپورٹ شنگ کرتگ ءُ بلوچستان ءَ زوریں بیگواھی، آزرادھی ءُ درکانودی کوشانی سر ءَ بژن درشان کرتگ۔
آئی ءَ گوشتگ کہ پروری 2026 ءِ میان ءَ کم چہ کم 109 مردم زور بیگواہ کنگ بوتگ ءُ پنجاہ مردم درکانودی کشگ بوتگ اَنت۔
پانک ءِ گوشگ اِنت کہ بلوچستان ءِ ھواری ءَ سند ءِ شھر کراچی ءُ پنجاپ ءِ شھر ڈیرہ گازی ھان ءَ ھم انسانی ھکانی لگتمالیانی کیس دیم ءَ اتکگ اَنت۔
آئی ءِ گوشگ اِنت کہ چہ کیچ ءَ ھپت، ڈیرہ بگٹی ءَ یکے، ڈیرہ گازی ھان ءَ چار، شال ءَ چاردہ، پَنجگُور ءَ ھشت، کراچی ءَ شش، سند، لاڑکانہ ءَ یکے، اسلام آباد ءَ یکے، گودار ءَ نُھ، مستونگ ءَ چار، ھب ءَ پانزدہ، ھزدار ءَ چار، نوشکی ءَ ھژدہ، آواران ءَ ھشت، سوراب ءَ دو، کلات ءَ سے، بارکان ءَ دو، واشک ءَ یکے ءُ چاگی ءَ یک مردمے بیگواہ کنگ بوتگ۔
گل ءِ گوشگ اِنت کہ چہ 109 زور بیگواھیں مردماں چل ءُ یک مردم چہ آزار دیگ ءَ پد یل کنگ بوتگ اَنت۔
پانک ءَ گوشتگ کہ بلوچستان ءَ انسانی ھکانی لگتمالی ءِ جاور یکشل ءَ گنتر بوگ ءَ اَنت ءُ زوریں بیگواھی، آزاردھی ءُ درکانودی کوش یک ترسناکیں ھدے ءَ گیش بوگ ءَ اَنت۔
گل ءَ لوٹ کرتگ ءُ گوشتگ کہ اے ویلانی بابت ءَ پٹ ءُ پول کنگ بہ بیت ءُ ایشی زمہ وار کانود ءِ رد ءَ جست گرگ بہ بنت ءُ سانمندیں کھول انساپ دیگ بہ بنت۔
پانک ءَ گوں میان استمانی تک ءَ لوٹ کرتگ کہ بلوچستان ءَ انسانی ھکانی لگتمالیانی سر ءَ دلگوش دیگ بہ بیت ءُ پہ اے جیڑہ ءِ گِر ءُ دار ءَ گامگیج زورگ بہ بیت۔
بنشون: رپورٹ اکس: پانک
