شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6105 روچ سرجم بوتگ کہ گل ءِ ایگزیکٹو کمیٹی ءِ کارکن نیاز ممھمد ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ زوربیگواھیں کمبر ء ھدابکش ءِ کھول زھرشانی گدان ءَ آتکگ۔ کھول ءِ رد ءَ بلیدہ ءِ جھمنندیں پازدہ سالی ئیں کمبر ء ھدابکش ءَ اکتوبر 2025 ءَ پاکستانی پوج ءَ چہ بلیدہ ءَ گس ءَ آوار جتگ ءُ بیگواہ کرتگ۔
کھول ءِ گوشگ اِنت کہ پنچ ءُ نیم ماہ ءِ گوزگ ءَ ابید کمبر ءِ بابت ءَ مارا ھچ وڑیں سرپدی دیگ ءَ نہ اَنت۔ چہ ایشی ءَ مئے کھول سکا جنجال اِنت۔
وی بی ایم پی ءِ نیمگ ءَ آئی کھول ءَ دلجمی دیگ بوتگ کہ گل کمبر ءِ کیس ءَ کانود ءِ رد ءَ پہ انساپ ءَ برجاھیں ادارھانی دیم ءَ پیش کنت ءُ پہ آئی سلامتی آجوئی ءَ ھمک جاہ ءَ توار چست کنت۔
وی بی ایم پی ءَ گوں سرکار ءُ ڈیھ ءِ ادارھاں لوٹ کرتگ کہ پہ کمبر ءِ آجوئی ءَ دلجمی دیگ بہ بیت ءُ کھول ءَ چہ اے جنجالاں درکنگ ءَ وتی کرد ءَ پیلو بہ کن اَنت۔
بنشون: درشان اکس: وی بی ایم پی
