بی ایس او ءِ چیئرمین بالاچ کادر گوں گل ءِ آدگہ کارکنانی ھمراھی ءَ تربت پریس کلب ءَ پریس کانپرنس کرتگ ءُ گوشتگ کہ بلوچستانءَ پر ایمنیں جمھوری سیاسی جھد ءِ دارگ ءِ جھد کنگ بوگ ءَ اِنت ءُ سیاسی کارکنانی بگیری ءَ دروگیں کیس کنگ ءُ آیاں ترسینگ ءَ اَنت۔
آئی ءَ گوشتگ کہ ما گوستگیں باز سال ایں گوں نودربر سیاست ءَ بندوک این ءُ ڈیھءِ آئین ءُ کانود ءِ رد ءَ گوں پر ایمنی ءَ سیاست کنگ ءَ ایں۔ آدگہ چاگردانی تہءَ سیاست ساڑاھگ بنت، بلے بلوچستانءِ انوگیں سرکار جمھوری جھد ءِ بگیری ءَ گامگیج زورگ ءَ اِنت۔
آئی ءَ گوشتگ کہ گوادر ءَ راجی مچی ءِ میانءَ من گوادر ءَ ساڑی نہ بوتگ آں، چہ ایشی ءَ ابیدایپ آئی آر نبیسگ بوتگ، ڈاکٹر ماہ رنگ بلوچ ءُ آدگہ سیاسی کارکنانی نام ھوار کنگ بوتگ اَنت۔ گوادر آمیدگس ءَ مئے مانزمانی منگ بوتگ ءُ جستءُ پرس بندات بوتگ ھمے روچ ءَ آمیدگس انگر کنگ ءُ مئے دزگیر کنگ ءِ جھد کنگ بوتگ۔
بالاچ کادر گوشتگ کہ چہ سرکارءِنیمگ ءَ ھمک پر ایمنیں سیاسی کارکن ناشرکار لیکگ بیتءُ سیاسی کارکنانی بگیری ءَ کیس کنگءُ ایپ آئی آر نبیسگ بیت۔
آئیءَ گوشتگ کہ اگاں سیاسی جھد میارے لیکگ بیت گڑا بلوچستان ءِ مزن وزیر پہ جار بہ گوش ایت کہ بلوچستان ءَ پر ایمنیں سیاسی جھد ءِ موکل نیست۔
بالاچ کادر ءِ گوشگ اِنت کہ منی نام پورتھ شیڈول ءَ ھوار کنگ بوتگ ءُ من ءَ گوں سلاہ بندیں گلاں نزیکی کنگءِ بھتام جنگ بوتگ۔ چہ جتائیں ادارھانی نیمگ ءَ تریسنگ بوتگ آں دانکہ من سیاسی کاراں یل بہ کن آں، بلے من آئین ءُ کانود ءِ راہ ءَ یل نہ کن آن ءُ کانود ءُ آئین ءِ رد ءَ وتی جھد ءَ برجاہ دار آں۔
بنشون: درشان اکس: رسانکدر
