بلوچ یکجھتی کمیٹی ءِ سروک ڈاکٹر سبیہ بلوچ ءَ وتی درشانے ءَ سئید بی بی ءِ گس ءَ پوج ءِ بیڑ برگ ایر جتگ ءُ گوشتگ کہ بی وائی سی ءِ سروک سئید بی بی گوستگیں پنچ ماہ اِنت یکشل ءَ زوراکیانی دیمپان اِنت۔آئی نام پورتھ شیڈول ءَ ھوار کنگ بوتگ، آ یک جنوزامیں زالبولے ءُ وتی چورھیں چکانی والینوک اِنت۔ پورتھ شیڈول ءَ ھوار کنگ ءَ پد یکشل ءَ تانہ ءَ پیش بوگ ءُ نوں شپ ءِ نیم ءَ آئی گس ءَ بیڑ برگ اے درسیں گامگیج نہ تھنا یک شھری یے ءِ آجوئی ءِ بگیری اِنت بلکیں آئی کسانیں زھگانی سسائی آزارانی سوب جوڑ بیت۔
آئی ءَ گوشتگ کہ ریاستی واک ءِ کارگرگ اگاں کانود، جست ءُ انسانی شرپ ءِ میان ءَ مہ بیت گڑا آ انساپ نہ بلکیں زوراکی یے گوشگ بیت۔ پہ انسانی ھکاں توار چست کنگ میارے نہ اِنت بلکیں یک آئینی ءُ اکلاکی زمہ واری یے۔ انسانی ھکانی کارکنانی ترسینگ اسل ءَ ایرادگریانی دارگ ءِ کوشت اِنت۔
ڈاکٹر سبیہ بلوچ ءَ گوشتگ کہ بی وائی سی ءِ پنچ سروک گوستگیں یک سالے بیت کہ زندانی اَنت، دگہ یک کارکنے نزر مری انگت بیگواہ اِنت۔ اے ویل داں اد ءَ بندوک نہ اِنت بلکیں یک دراجکشیں سیاسی جیڑھے پیش دار ایت کہ توانمند بلوچ چکچینی ءَ ھر پیم ءَ برجاہ دار اَنت۔
بنشون: درشان. اکس: دامگ