بلوچ لبریشن آرمی (بی ایل اے ) ءِ جارکش جیئند بلوچ ءَ وتی درشان ءَ گوشتگ کہ آپریشن ھیروپ ءِ دومی بھر ءَ دزگیر کرتگیں پاکستانی پوج ءِ ھپتیں کارمند مرگ ءِ سزا داتگ انت۔
آئی گوشتگ کہ اے کارمند پوج ءِ ریگولر یونٹ ءِ بھر بوتگ اَنت ، بلوچ راجی آمید گس ءَ جنگی میاربار ،بلوچ چکچینی، زوریں بیگواھی ءُ شھراں زوراکیاں ھوار بوگ ءِ پژدر ءَ مرگ ءِ سزا داتگ۔ گل ءَ جھانی جنگی کانود ءُ انسانی شرپ ءُ راھبندانی ھیالداری کرتگ ءُ چاردہ پروری ءَ اے دزگیر کرتگینانی یل کنگ ءِ جاہ ءَ پہ بلوچ بندیگانی یل کنگ ءَ یک ھپتگے داتگ اَت، انسانی ھمدردی ءِ بنیاد ءَ انگت ءَ چاردہ روچ دیگ بوتگ۔
آئی ءَ گوشتگ کہ اے دراجکشیں وھد ءَ اے ھم راست بوتگ کہ زورگریں پاکستانی ریات ءُ آئی سروکاں وتی کارمندانی جانانی پرواہ نیست۔ دژمن ءَ پہ جنگی بندیگانی مٹ کنگ ءِ جاہ ءَ بنداتی رھوت یک چالے ءِ بنیاد ءَ کار گپتگ اَنت ءُ اے میان ءَ یک مزنیں کچے ءَ لشکرکشی ءُ زوراکی کرتگ۔ یک نیمگے ءَ گپانی ٹالینگ ءُ دراجکش کنگ ءِ نیمون کرتگ ءُ وھد زوال کرتگ۔ دومی نیمگ ءَ گوں ھیلی کاپٹر، ڈرون ءُ مزنیں سلاھانی کمک ءَ لشکرکشی بندات کرتگ۔
جارکش ءَ گوشتگ کہ بی ایل اے ءِ سینئر کمانڈ کونسل ھمے آسر ءَ سر بوتگ کہ دژمن انسانی بنیاد ءَ داتگیں وھد ءَ نپ زورگ ءُ گیش ھونریچی کنگ ءُ بلوچ سرمچاراں بے وار کنگ ءَ اِنت۔ گل ءَ اکلاکی گھتری ءُ جھانی کانود ءِ رد ءَ دژمن ءِ واتری ءَ جھد کرتگ بلے زورگریں دژمن ءَ یکشل ءَ مکاری کرتگ ءُ رد دیگ ءِ کوشست کرتگ کہ آ تھنا زور ءِ زبان ءَ سرپد بیت۔ پمشکا بلوچ آمیدگس ءِ پیسلہ ءِ رد ءَ جنگی بندیگانی مرگ ءِ سزا ءِ سر ءَ کار کرتگ۔ ایشی درسیں زمہ واری پاکستانی پوج ءُ آئی کمانڈ ءِ سر ءَ اَنت کہ آئی وتی سپاھیانی زندگی ارزشت نہ داتگ ءُ چال ءُ مکاری کرتگ۔
بنشون: درشان اکس: زرمبش
