ایران ءِ انسانی ھکانی ادارہ ھلال اھمر ءِ رد ءَ ایران ءَ امریکی ءُ اسرائیلی ارشانی بندات ءَ داں انوں 555 مردم بیران بوتگ۔
آئی گوشگ اِنت کہ امریکی ءُ اسرائیلی ارشاں ایران ءِ 130 ءَ گیش شھر نشانگ کنگ بوتگ۔
ایرانی سرکار ءِ رد ءَ زرباری ایران ءَ یک ارشے ءِ آسر ءَ زھگاں ھوار کم چہ کم 153 مردم بیران بوتگ۔ میاب ءَ جنکانی وانگجاہ پاسدار انکلاب ءِ اڈہ ءِ نزیک ءَ بوتگ۔ اے اڈہ پیسر ءَ نشانگ کنگ بوتگ۔
ایرانی سرکار ءِ گوشگ اِنت کہ اے ارش اسرائیل ءُ امریکہ ءَ کرتگ، بلے امریکی بلوچ ءِ سینٹر کمانڈ ( سینٹ کام )ءِ گوشگ اِنت کہ آ اے ویل ءِ رپورٹ ءِ بابت ءَ پٹ ءُ پول کنگ ءَ اِنت۔ اسرائیلی پوج ءِ گوشگ اِنت کہ اے ھند ءَ آئی ڈی ایپ ءِ کاروائی ءِ بابت ءَ ھچ سرپد نہ ایں۔
دومی نیمگ ءَ ایران ءِ اسرائیل ءِ سر ءَ درستاں مستریں ارشاں نھ مردم مرتگ ءُ 27 ٹپی بوتگ۔ ایران ءَ اے میزائل ارش اسرائیل ءِ شھر بیت شمس ءَ کرتگ اَنت۔
اے بابت ءَ امریکی سدر ڈونلڈ ٹرمپ ءِ گوشگ اِنت کہ امریکہ ءُ اسرائیل چار داں پنچ ھپتگ ءَ ایران ءِ سر ءَ ارش ءَ ھمے ھساب ءَ گوں ترندی ءَ برجاہ دار اَنت۔ اے گران نہ اِنت، مئے کِر ءَ سلاہ سک باز اِنت۔
آئی ءِ گوشگ اِنت کہ اے وھد ءَ پہ سروکی کنگ ءَ ایران ءِ کِر ءَ سے شریں امیدوار ھست، بلے آئی ءَ کسی ھم نام نہ گپتگ۔
یک شمبے ءِ روچ ءَ ایران ءِ سپریم نیشنل سکیورٹی کونسل ءِ کارگشاد الی لاریھانی ءِ گوشگ اِنت کہ پہ نوکیں سروک ءِ گچین کنگ ءَ پیش یک پترے ٹھینگ بیت۔
دومی نیمگ ءَ ایران ءَ اسرائیل ءُ امریکہ ءِ اڈھانی سر ءَ نوکیں اُرشانی درچ بندات کرتگ۔
جھانی رسانکدر ءِ رد ءَ ایران ءَ نوکیں اُرشاں بھران ءِ بنجاھی شھر منامہ، دبئی، ابو زھبی ءُ دوھہ ءَ دوشمبے ءِ سھب ءَ تراکانی توار اِش کنگ بوتگ اَنت۔
اے ایپ پی ءِ رد ءَ اراک ءُ اربیل بالہ پٹ ءِ نزیک ءَ کم چہ کم دو ڈرون اُرش بے سوب کرتگ۔
سی این این ءِ گوشگ اِنت کہ دبئی ءَ دو ترکانی توار ءُ جنگی گرابانی توار اِش کنگ بوتگ اَنت۔ کتر ءِ بنجاھی شھر دوھہ ءَ میزائل اُرش بے سوب کنگ بوتگ اَنت۔
ھمے وڑ ءَ اسرائیلءِ پزائیہ ءِ گوشگ اِنت کہ چہ ایران ءِ نیمگ ءَ اسرائیل ءِ سر ءَ آس داتگیں میزائلانی بے سوب کنگ ءِ جھد کنگ بوگ ءَ اِنت۔
بنشون: بی بی سی. اکس: بی بی سی
