بلوچ وومن پورم ڈیرہ گازی ھان ھنکین ءِ آرگنائزنگ باڈی دیوان بلوچ وومن پورم بنجاھی سرکماش ڈاکٹر شلی ءِ سروکی ءَ برجم دارگ بیتگ۔ دیوان ءَ سرکولر، گل ءِ کار، ھندی ءُ میان استمانی سیاسی جاور ءُ آؤکیں گامگیج ءِ سر ءَ گپ ءُ تران کنگ بیتگ۔
آیاں تران کرتگ ءُگوشتگ کہ بلوچستان ءِ ھما ھند ءَ بلوچ نشتگ اَنت اود ءَسیاست ردیں کارے لیکگ بیت ءُ اے پندل سرکار ءِ جوڑ کرتگیں پندل اِنت دانکہ بلوچ چہ وتی ھکاں بے سما بہ بیت ءُپہ وتی راجی ھکاں پاد میئیت۔ ھمے پندل بلوچستان ءِ کنڈ کنڈ ءَ گندگ بیت۔ باز ھند ءَ ھمے پندل ءَ باز سان دور داتگ کہ چہ ایشی ءَ ھمے گپ کنگ بیت کہ مردمانی بدھالی ءِ مانزمان ھمے ھندی ٹکی نزام ءُ سردار اَنت۔ دومی نیمگ ءَ راستی ایش اِنت کہ سرکار پہ بلوچ ءِ چہ سیاست ءَ دور دارگ ءَ ھمے وڑیں گپ دیم ءَ آرگ ءَ اِنت چی ءَ کہ مھلوک پہ وتی ھکاں پاد مہ ایت۔
آئی ءَ گوشتگ کہ مرچی بلوچ وومن پورم ءِ نیمگ ءَ ڈیرو ھنکین ءِ جوڑ بیگ اے گپ ءِ وت گواھی ءَ دنت کہ بلوچ مھلوک مرچی پہ وتی سیاسی جھد ءَ ھمک ھند ءَ پاد آھگ ءَ اِنت۔ ما ڈیرو مھلوک ءَ ھمے کلوہ ءَ دیگ لوٹ ایں کہ پہ راجی جھد ءَ پاد بیا اِت ءُوتی راجی زمہ واریانی پیلو کنگ ءَ وتی لوگ ءِ جنین ءُ زھگاں سیاسی جھد ءَ ھوار بہ کن اِت۔
آیاں گوشتگ کہ مرچی ڈیرو ءِباسما ءُ زانوگریں جنین وتی راجی زمہ واریاں سرپد بیتگ اَنت ءُ بلوچ وومن پورم ءِ بھر بیتگ اَنت ما ھمے اوست ءَ دار ایں کہ ھمے سنگت ڈیروءَ سیاسی جھد ءَ وتی کرد ءَ پیلو کن اَنتءُ بلوچ مھلوک ءِ سیاسی ھلیکاری ءِ کار ءَ برجم دار اَنت۔ ڈیرو ءِ بلوچ جنینانی سیاسی جھد ءَ ھوار بوگ نہ تیوک ءَ ڈیرو بلکیں بلوچستان ءِ کلیں مھلوک ءِ وش بھتی اِنت۔ ھمے اوست ءَ دارایں کہ سنگتانی جھد الم سوبین بیت ءُ سنگت بلوچ وومن پورم ءُ راجی زمہ واریاں پیلو کن اَنت ءُپہ بلوچستانءِ آدگہ ھندانی جنیناں کار ارزان بنت۔
آھوکیں گامگیج ءَبلوچ وومن ڈیرہ گازی ھان ھنکین ٹھینگ بیتگ پوزیہ سرکماش، مبشرہ ڈپٹی کمک سرکماش، گوھر، شاری ءُ سمل آرگنائزنگ باڈی ءِ باسک گچین کنگ بیتگ اَنت۔
