بلوچ اسٹوڈنٹس ایکشن کمیٹی ءِ جارکش ءَ وتی درشانے ءَ گوشتگ کہ دود ءُ ربیدگ یک راجے ءِ بنیادی ھستانکی بُنبھرے ءُ آئی ءِ راجی بچار ءَ گوں بندوکیں شئے یے۔ ھمک راج ءِ جتائیں دود اَنت کہ چہ ایشی ءَ آئی تب، پِگر ءُ ھیال، روشِت، زبان، دین، زانت ءُ زانشت ءُ ایدگہ شئے جوڑ بنت کہ چہ ایشاں آ یک پجارے ءِ واھند بیت۔ دود راجمان ءِ رواج داتگیں ھما کانود اَنت کہ آھاں چہ ھما راج وت ءَ یک دستورے ءِ پابند کنت۔
آئی ءَ گوشتگ کہ ھمے پیم ءَ بلوچ ھم یک کاملیں دود ءُ ربیدگے ءِواھند اِنت کہ چہ ایشی ءَ بلوچ راجمان یکجاہ ءُ یکساہ اِنت۔ پہ مھلوک ءَ دود زِند ءِ ھمک روچی ئیں بھرے بلے پہ بلوچ دود ءُ ربیدگ ءِ روچ ءِ دارگ ءَ دو مارچ ھاسیں روچے ایر کنگ بیتگ دانکہ اے روچ ءَ دنیا ءَ نِشتگیں کُل بلوچ وت ءَ یک راجے ءِ بستار ءَ یات بہ کن اَنت۔
آئی ءَ گوشتگ کہ اے درگت ءَ گل وتی کُلیں ھنکیناں پابند کنت کہ دو مارچ بلوچ دود ءُربیدگی روچ ءَ زانشتی رنگ ءَ برجم بہ دار اَنت، وتی ھست ءُ گوست ءِ دود ءُ آھاں گوں بندوکیں گپچلانی سر ءَ دیوان اڈ بہ دیے اَنت۔
بنشون: درشان. اکس: مونوگرام