بلوچ سٹوڈنٹس کونسل پنجاب یونیورسٹی ءِ جارکش ءَ وتی درشان ءَ گوشتگ سرجمیں ڈیھ ءَ بلوچ نودربراں پجار ءِ بنیاد ءَ یکشل ءَ نشانگ کنگ ءُ آ مچی سزا ءِ دیمپانی کنگ بوگ ءَ اَنت۔ ڈیھ ءِ ھمک کنڈاں بلوچ نودربر روچ پہ روچ بیگواہ کنگ بوگ ءَ اَنت۔ پنجاب یونیورسٹی ءَ ھم بلوچ نودربر یکشل ءَ سسائی آزاردھی ءِ نشانگ، ترسینگ ءُ گوں آیاں ریا ءُ رو کنگ بوگ ءَ اِنت ۔
آئی ءَ گوشتگ کہ اے رویشت ءَ دیر اِنت کہ برجاہ اِنت ءُ نوں اے گیش کنگ بوتگ۔ 23 پروری 2026 ءَ یکبرے پد ءَ مئے کلانھیں نودربرے ترسینگ بوتگ۔ لھتیں سادگ پوشاکیں مردم وانگجاہ ءِ واب جاہ ءَ آئی کوٹی ءَ پترتگ اَنت ءُ آئی تامر جوڑ کرتگ ءُ آ بیھار داتگ ءُ سسائی آزار داتگ۔ اے ویل بلوچ نودربرانی بگیری ءَ برجائیں یک پدریں منانکے۔
آئی گوشتگ کہ یونیورسٹی ءَ پیسر ءَ ھم گوشتگ کہ آ وتی چونیں ھم کارکنے ءِ سلامتی ءِ سر ءَ ھچ وڑیں زوراکی اوپار نہ کنت۔
آئی گوشتگ کہ ما گوں پنجاب یونیورسٹی ءِ انتزامیہ ءَ لوٹ کن ایں کہ آ زوت یک پٹ ءُ پولی کمیٹی یے جوڑ بہ کنت ءُ آئی تہ ءَ بلوچ اسٹوڈنٹس کونسل ءِ سروک ھوار بہ بنت۔ اے کمیٹی ءَ نودربرانی بگیری ءَ بیوکیں پروپائلنگ، ترسینگ ءِ درسیں کیسانی پٹ ءُ پول کنگ بہ بیت ءُ آیانی دارگ ءَ ترندیں گامگیج زورگ بہ بیت۔
آئی گوشتگ کہ اگاں یونیورسٹی ءِ انتزامیہ ءَ اے جیڑہ ءَ گوں سنگینی ءَ نہ زرت ءُ زوت گامگیج نہ زرت گڑا بلوچ اسٹوڈنٹس کونسل یک ترندیں گامگیجے ءِ زورگ ءِ پیسلہ ءَ کنت۔ ایشی درسیں زمہ واری یونیورسٹی انتزامیہ ءِ سر ءَ بنت۔
بنشون: درشان اکس: مونوگرام
