شال: شمبے ءِ روچ ءَ بلوچ یکجھتی کمیٹی ءِ نیمگ ءَ برجاھیں مچی ءَ پروپیسر ڈاکٹر منزور ءَ تران کرتگ ءُ گشتگ نواب اکبر ءِ شھیدی ءَ پد مردم پاد آتکگ اَنت گڑا ھزدار ءُ پنجگُور کربلا جوڑ کنگ بوتگ مشکے ءَ بمبگواری کنگ بوتگ، ھمے وڑ ءَ جتائیں ھند پہ بلوچاں ترّ ءُ گرد کنگ ءِ وڑ ءَ نہ اَنت۔
آئی ءَ گوشتگ کہ آ وھد ءَ ھزدار ءَ کشندہ ٹولی جوڑ کنگ بوتگ اود ءَ دو دو یا سے سے برات شھید کنگ بوتگ گڑا مردماں چہ ترس ءَ آیانی نام ءَ نہ گپتگ، پرس نہ داشتگ، بلے مرچی ھزدار پاد آتکگ۔
پروپیسر منزور گوشتگ کہ ما اسلام آباد ءَ شتگیں بلے بہ کول نواب اکبر بگٹی ءَ نہ اود ءَ اسلام بوتگ ءُ نہ آباد بوتگ، ما اود ءَ چے کہ دیستگ گڑا آیاں شمئے دیم ءَ ایر کنگ لوٹ ایں۔ ھما روچ ءَ کہ اود ءَ مراگشے برجم دارگ بوتگ آ جاہ ٹٹ کنگ بوتگ کس ءَ تہ ءَ آھگ ءِ موکل نہ بوتگ۔
آئی ءَ گوشتگ کہ من ءَ ھمے گپ ءَ بژن بیت ھما کہ ھکی ئیں پاکستان اِنت اود ءَ نہ پوسٹر ءُ نہ بیرک ھچ گندگ نہ بیت، وھدے کہ اے ایردستیں سرڈگار ءَ کائے اد ءَ بیرک، پوسٹر ءُ گچینکاری اِنت، من سرپد نہ باں کہ ھزارانی کچ ءَ کھول مچی سزا ءِ آماچ اَنت، ھزارانی کچ ءَ مردم چیریں آزارجاھاں بندیگ اَنت گڑا اد ءَ چونیں گچینکاری یے، چونیں راجمستری ءُ پہ کیا راجمستری اِنت؟
ڈاکٹر منزور ءَ گوشتگ کہ ھما مردمانی پاداں چمپل نہ بوتگ آ کروڑ پتی جوڑ کنگ بوتگ اَنت بلوچستان ءِ ناماں کربانی کچ ءَ زر ورگ بوتگ، آدگہ جیڑھاں یل دے داں مرچی ءَ اسمبلیانی تہ ءَ لین، آپ بے روزگاری ءِ جیڑہ ھم گیش ءُ گیوار کنگ نہ بوتگ۔ یک ایم پی اے ءَ شانزہ ارب رستگ بلے بژن ءِ گپ ایش اِنت کہ پاکستان ءِ چیردستیں بلوچستان ءَ ورنایاں ھاک روپگ ءِ نوکری نہ رس ایت۔
آئی ءَ گوشتگ کہ اے جنگ تیوک ءَ زور بیگواھیں مردمانی نہ اِنت بیگواھیں ھکانی اِنت۔ مرچی چہ تونسہ داں لیاری ءَ بلوچ پاد آتکگ اَنت اے دگہ ھچ وڑیں لب ءُ زرے نہ لوٹ اَنت۔ مئے لوٹ دو اَنت راجی پدریچ ءُ زور بیگواھیں مردمانی آجوئی اِنت۔
پروپیسر منزور ءَ گوشتگ کہ اے جنگ چہ دوھزار ءَ مئے سر ءَ دور دیگ بوتگ مرچی بیست ءُ چار سال اِنت برجاہ اِنت۔ مئے ورنایانی چم کشگ بوتگ اَنت، زندگ ءَ سوچگ بوتگ اَنت بلے بلوچ نہ پرشتگ۔
