وائس پار بلوچ مسنگ پرسن ( وی بی ایم پی ) ءَ وتی درشان ءَ گوشتگ کہ برکت الی ءَ گوں وی بی ایم پی ءَ رھوت کرتگ ءُ وتی برات مھمدرشید ءِ زوریں بیگواھی ءِ بابت ءَ گل ھال داتگ۔
برکت الی ءِ گوشگ اِنت کہ آئی برات مھمد رشید ء مولا بکش ڈیرہ بگٹی ءِ جاہ منند اِنت ءُ پولیس ءِ سپاھی یے، آ 2 پروری 2021 ءَ چہ شال ءَ زور بیگواہ کنگ بوتگ۔
آئی ءَ گوشتگ کہ من پہ وتی برات ءِ آجوئی ءَ گوں سرکاری جھگیر ءُ انتزامیہ ءَ باز بر ءَ گپ جتگ، نہ منی برات آجو کنگ بوتگ ءُ نہ آئی بابت ءَ مارا سرپدی دیگ ءَ اَنت۔ چہ ایشی سوب ءَ مئے کھول جنجالانی دیمپان اِنت۔
وی بی ایم پی ءِ چیئرمین نسر اللہ بلوچ ءَ گوں سرکار ءَ لوٹ کرتگ کہ آ پہ مھمد رشید ءِ آجوئی ءَ دلگوش ءَ گور بہ کن اَنت ءُ پہ آئی آجوئی ءَ دلجمی بدے اَنت۔ اگاں آئی سر ءَ چونیں ھم بھتامے ھست گڑا پہ آئی دیم ءَ آرگ ءَ وتی آئین ءِ کرد ءَ پیلو بہ کن، دانکہ کھول چہ اے رنجاں آجو بہ بیت۔
آئی ءَ گوشتگ کہ گل ءَ ھمے ھال سر بوتگ کہ 18 پروری ءَ پاکستانی پوج ءَ چہ ھزدار ءِ ھند گزگی ءَ مشکے، نوکجو ءِ جاہ منندیں زالبول ھیات بی بی آوار جنگ ءَ پد بیگواہ کرتگ۔ ما ایشی ءَ ایر جن این ءُ بلوچ زالبول ءِ زوت دیم ءَ آرگ ءِ لوٹ ءَ کن ایں۔
بنشون: درشان. اکس: رسانکدر
