شال ءَ پہ بیگواھیں مردمانی آجوئی ءَ وائس پار بلوچ مسنگ پرسن ءِ زھرشانی گدانءَ 6087 روچ سرجم بوتگ۔ مرچی نیاز مھمد گدانءَ ساڑی بوتگ۔
وی بی ایم پی ءِ گوشگ اِنت کہ زور بیگواھیں مھمد ارپان کمبرانی ءِ کھول ءَ گوں وی بی ایم پی ءِ چیئرمین نسر اللہ بلوچ ءَ گند ءُ نند کرتگ ءُ آئی زوریں بیگواھی ءِ کیس یاداشت کرتگ ءُ گوشتگ کہ مھمد ارپان کمبرانی ء کمال الدین ءَ سی ٹی ڈی ءُ آدگہ ادارھانی کارمنداں22 جنوری ءِ شپ ءَ چہ کلی کمبرانی شال ءَ آوار جنگ ءَ پد بیگواہ کرتگ۔
کھول ءِ گوشگ اِنت ما پہ مھمد ارپانءِ آوارجنی ءِ بابت ءَ باز بر ءَ گوں انتزامیہ ءَ رھوت کرتگ، بلے آ نہ مارا مھمد ارپان ءِ آوارجنی ءِ سوب ءَ گوشگ ءَ اَنت ءُ نہ آئی سلامتی ءِ بابت ءَ مارا سرپدی دیگ ءَ اَنت۔ چہ ایشی ءَ مئے سرجمیں کھول جنجال اِنت۔
نسر اللہ بلوچ ءَ کھول دلجمی داتگ کہ چہ گل ءِ نیمگ ءَ مھمد ارپان ءِ زوریں بیگواھی ءِ کیس ءَ پہ زور بیگواھیں مردماں جوڑ کرتگیں کمیشن ءُ بلوچستان سرکار ءَ دے این ءُ پہ آئی آجوئی ءَ ھمک جاہ ءَ توار چست کن ایں۔
نسر اللہ بلوچ ءَ چہ سرکار ءُ ڈیھ ءِ ادارھاں لوٹ کرتگ کہ آ پہ مھمد ارپان ءِ آجوئی ءَ وتی کرد ءَ پیلو بہ کن اَنت ءُ آئی کھول ءَ چہ اے رنجاں بہ کش اَنت۔
بنشون: درشان اکس: وی بی ایم پی
