پاکستانءَ دوشی اوگانستان ءِ رودرآتکی استان ننگرھار ءُ پکتیکا ءِ جتا جتائیں شھراں بمبگواری کرتگ کہ ایشی آسر ءَزھگءُ زالبولاں ھوار بازیں کچے ءَ مردم بیران ءُ ٹپی بوتگ اَنت۔
جھانءِ رسانکدر ءِ رد ءَ ننگرھار ءِ ھند بھسود ءَ چہ پاکستان ءِ بمبگواریءَ یکیں کھول ءِ ھبدہ مردم بیران بوتگ۔ آیانی تہ ءَ شھاب الدین ء زیا الدین، شراکت ء شھاب الدین،شیرء نزاکت، پکر آلم ء نزاکت، نور آلم ء نزاکت، میرآلم ء نزاکت، پریشہ ء نزاکت، ھدیجہ ء نزاکت، مروہ ء نزاکت، نزاکت ءِ لوگبانک مھمندہ، بی بی روزہ ء این الدین مجاھد، نازمہ ء شراکت،شمس ء شراکت، آپتاب ءشراکت، باسد ء شراکت ءُ مھمد شراکت ھوار اَنت۔
اوگان سرکار ءِ رد ءَ ارش دوشی یازدہ ءَ بندات بوتگ اَنت۔ پاکستان ءِ برزی ارشانی آسر ءَ گس ءُ مدرسہ ھم تباہ بوتگ اَنت۔
انٹر نیشنل ھیومن رائٹس پاونڈیشن ءَ پاکستان ءَ اے ارش ایر جتگ اَنت ءُ گوشتگ کہ اے کاروائی میان استمانی کانود ءِ بگیری اِنت۔
آئی ءَ گوشتگ کہ وپتگیں زھگاں ھوار یک سرجمیں گسے ءِ مردمانی کوش ءَ ھچ وڑءَ نیمون کنگ نہ بیت۔
آئی ءَ لوٹ کرتگ ءُ گوشتگ کہ اے برزی ارشانی بابت ءَ زوت پٹ ءُ پول کنگ بہ بیت ءُ ایشی پرمان دیوک جست گرگ بہ بنت۔
بنشون: جھانی رسانکدر اکس: دامگ
