بلوچ اسٹوڈنٹس کونسل پنجاب ءِ جارکش ءَ وتی درشان ءَ گوشتگ کہ سرجمیں ڈیھ ءَ بلوچ نودربرانی زوریں بیگواھی ءُ درکانودی کوش ءِ تہ ءَ سکا باز گیشی آرگ بوتگ۔
آئی گوشتگ کہ ھمدان بلوچ ء مھمد الی ءِ یک نودربرے اَت ءُ کراچی ءِ ھند منگوپیر کوھنیں گولیمار ءِ جھمنندے اَت۔ آئی کھول ءِ رد ءَ 29 دسمبر 2025 ءَ چہ گولیمار ءِ ھند دوبی گھاٹ ءَ پاکستانی پوج ءَ آوار جتگ ءُ بیگواہ کرتگ۔ رند ءَ آئی زوربیگواھی سی ٹی ڈی ءَ من اِتگ ءُ گوشتگ کہ ناشرکاری گر ءُ دار ءِ آمیدگس ءَ پیش کنگ بیت۔ بلے بد بھتی ءَ آ آمیدگس ءَ پیش کنگ دو روچ پیش ھژدہ پروری 2026 ءَ دروگیں میڑے ءَ گوں دگہ سَے مردماں ھوار کشگ بوتگ۔
آئی گوشتگ کہ دومی نیمگ ءَ بلوچ نودربرانی زوربیگواھی ءِ سکا تیز کنگ بوتگ،دانیال بلوچ کہ نمل یونیورسٹی ءَ گورنس ءُ پبلک پالیسی ءَ گریجویٹ کرتگ۔ آ چہ کراچی ءَ گوں دگہ دو سنگتاں ھوار 16 پروری ءَ آوار جنگ ءُ بیگواہ کنگ بوتگ۔
بلوچ اسٹوڈنٹس کونسل پنجاب ءِ جارکش ءَ لوٹ کرتگ کہ بلوچ نودربرانی زوریں بیگواھی ءُ درکانودی کوش بند کنگ بہ بیت۔ ھمدان بلوچ کہ آ ناشرکاری ءِ گر ءُ دار ءِ آمیدگس ءَ پیش کنگ ءَ دو روچ پیش دروگیں میڑ ءَ کشگ بوگ ما ھمے سرپد بہ ایں کہ ریاست ءِ بلوچ دژمن ءُ بلوچ چکچینی ءِ پالیسی ءِ رد ءَ اِنت۔
بنشون: درشان اکس: مونوگرام
