بلوچ اسٹوڈنٹس ایکشن کمیٹی ءَ وتی درشان ءَ گوشتگ چوش کہ 1999 چہ یو این او ءِ نیمگ ءَ بیست ءُ یک پروری ماتی زبانانی میان اُستمانی روچ نامینگ بیت۔ اے درگت ءَ گل ھمک سال ءِ رنگ ءَ اے سال ءَ ھم ماتی زبان ءِ سر ءَ جتا جتائیں دیوان ءُ پروگرام اڈ دنت۔ زبان یک راجے ءِ ارواہ زانگ بیت۔ بزاں زبان راجے ءِ ربیدگ، دودمان، ربیتی زانشت، واھگ ءُ مارشت یا کہ آزمودگاں درانگاز کنگ ءِ وسیلہ اِنت۔
آئی ءَ گوشتگ کہ زبان ھما گپ جنوکیں مردمانی راجدپتر ءِ دیم ءَ بروک اِنت۔ راجانی جوڑشت ءِ تہ ءَ زبان مستریں بن بھراں چہ یکے۔ بزانکہ زبان راج ءِ زانشتی، ربیدگی ءُ ازمی یاکہ دودمانی سنچ ءُ سما ءِ دیمدرائی ءِ مانزمان اِنت۔
آئی ءَ گوشتگ کہ گل وتی کلیں ھنکیناں پابند کنت کہ اے روچ ءِ درگت ءَ ھنکین وتی ھنداں ماتی زبانانی سر ءَ جتائیں دیوان ءُ پروگرام اڈ بہ دئے اَنت۔
بنشون: درشان اکس: مونوگرام
