شال: وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6085 روچ سرجم بوتگ کہ شال پریس کلب ءِ دیم ءَ برجاہ بوتگ۔ بارکان ءَ درکانودی کشگ بوتگیں منزور اھمد ءُ بگن ھان ءِ کھول گدان ءَ آتکگ اَنت ءُ وتی زوربیگواھیں مردمانی درکانودی کوش ءِ بگیری ءَ زھرشانی یاداشت کرتگ۔
ابداللہ جتوئی ءَ گوں وی بی ایم پی ءَ گوشتگ کہ منی زھگ منزور اھمد پاکستانی پوج ءَ چہ سبی ءِ ھند ڈاڈر ءَ نھ ماہ پیش آوار جتگ ءُ بیگواہ کرتگ اَت ءُ بارکان ءَ دروگیں میڑ ءَ کشتگ ءُ آئی لاش چگل داتگ۔
بگن ھان ءِ مات ءَ گوشتگ کہ منی زھگ بگن ھان ء نواب ھان ءَ ادارھانی کارمنداں چہ بلوچستان ءِ ھند نوتال ءَ دو سال پیش آوار جتگ ءُ بیگواہ کرتگ اَت ءُ بارکان ءَ دروگیں میڑ ءَ درکانودی کشگ بوتگ۔
وی بی ایم پی ءِ چیرمین نسراللہ بلوچ ءُ ھوران بلوچ ءَ منزور اھمد ءُ بگن ھان ءِ لاش چہ سی ٹی ڈی ءَ گپتگ ءُ آئی کھول ءِ دست ءَ داتگ اَنت ءُ پہ کل کنگ ءَ آیانی بنکی ھنکین ءَ دیم داتگ۔
وی بی ایم پی ءِ چیرمین نسراللہ بلوچ ءَ گوشتگ کہ زوربیگواھیں منزور اھمد ءُ بگن ھان ءِ درکانودی کوش انسانی ھکانی گنتریں لگتمالی اِنت۔ ایشی چنچو ایر بہ جن ایں کم اِنت۔
آئی پہ انساپ ءَ جوڑ بوتگیں ادارھاں گوں لوٹ کرتگ کہ پوجی ادارھانی دست ءَ دروگیں میڑ ءَ بیگواھیں بلوچانی درکانودی کوش ءِ بگیری ءَ گامگیج بہ زور اَنت۔ اے درانسانی زوراکی ءَ ھواریں مردمانی بگیری ءَ پہ کانودی کاروائی کنگ ءَ دلجمی بہ دے اَنت ءُ کھولاں ڈیھ ءِ راھبند ءِ رد ءَ انساپ دیگ ءَ وتی کرد ءَ پیلو بہ کن اَنت۔
بنشون: درشان. اکس: وی بی ایم پی
