مستونگ ءَ چہ پاکستانی پوج ءِ تیرگواری ءَ بیران بوتگیں ورنا سید اھسان شاہ ءِ مات ءَ وتی شنگ کرتگیں تامربندے ءَ گوشتگ کہ منی زھگ 3 جون 2025 ءَ ریاستی ادارھاں پمشکا شھید کرتگ کہ آئی پہ ریاستی ادارھاں چاریگی نہ کرتگ۔
آئی ءَ گوشتگ کہ بلوچستان ءَ ورنا ھمک روچ ریاستی چیردستی ءَ کارکنوکیں کشندہ ٹولی ءِ دست ءَ زور بیگواہ کنگ بوگ ءَ اَنت، رند ءَ آیانی ژانگولیں لاش جنگلاں دزکپگ ءَ اَنت۔ ورنائیں سید اھسان شاہ ھم ھمے وڑ ءَ درکانودی شھید کنگ بوتگ۔
آئی ءَ گوشتگ کہ من وتی زھگ ءِ کشندھانی بگیری ءَ توار چست کرتگ گڑا منی پہ بے توار کنگ ءَ کشگ ءِ بیھار دیگ بوتگ۔ بلوچستان ءَ ھما مردم کہ زوراکیانی بگیری ءَ توار چست کنت گڑا آئی ءَ انساپ دیگ ءِ جاہ ءَ زوریں بیگواھی ءُ کشگ ءِ بیھار دیگ بیت۔
آئی ءَ گوشتگ کہ من گوں بلوچ راج ءَ ھوار، سرجمیں جھان ءِ انسان دوست ءُ گوں میان استمانی انسانی ھکانی اداراھاں لوٹ کن آں کہ آ بلوچستان ءَ برجاھیں انسانی ھکانی لگتمالی ءُ بلوچ چکچینی ءِ بگیری ءَ توار چست کنگ ءَ وتی کرد ءَ پیلو بہ کن اَنت۔
بنشون: درشان. اکس: دامگ
