بلوچ یکجھتی کمیٹی ءِ گوشتگ کہ دولت بلوچ ء بدل تجابان ءِ جاہ منند اِنت ءُ گریبیں کھولے ءِ مردم اِنت وتی ھند ءَ زمینداری کنگ ءَ بوتگ۔
آئی ءَ گوشتگ کہ مارچ 2022 ءَ ایپ سی ءَ آئی گس ءَ بیڑ برتگ ءُ دولت ءُ آئی دوازدہ سالیگیں برات داں یک ماھے ءَ بیگواہ کرتگ اَنت۔ آ یل بوگ ءَ پد ھم چہ زوراکی ءُ ناھکیاں پھریز نہ بوتگ اَنت۔
آئی ءَ گوشتگ کہ 18 پروری 2026 ءَ نیمروچ ءِ دو ءَ وھدے کہ آ گس ءَ واتری آھگ ءَ بوتگ کہ موٹرسائیکل سواریں کشندہ ٹولی ءِ کارمنداں نشانگ کرتگ ءُ کشتگ۔
بی وائی سی ءَ گوشتگ کہ آئی کھول سکا ترس آماچ اِنت ءُ پہ وتی آزیزانی پھریزگ ءَ نا درس اِنت۔ ھمے جست ءَ کن اَنت کہ ما کج ءَ بہ رویں، ما چون زندگ بوت کن ایں، گوں وتی راج ءَ مھر کنگ میارے جوڑ بوتگ۔ اے ناھکی تھنا دولت بلوچ ءِ بگیری ءَ نہ اِنت، بلکیں ھمک بلوچ ءِ بگیری ءَ اِنت۔
آئی ءَ گوشتگ کہ گوں انسانی ھکانی کارکن ءُ میان استمانی ادارھاں لوٹ کن ایں کہ زوت گامگیج بزور اَنت ءُ زوریں بیگواھی، دروگیں میڑ، درکانودی کوش ءُ نشانگ کنگ ءِ درچ بند کنگ بہ بیت۔ بلوچ مھلوک ءَ وتی سرڈگار ءِ سر ءَ آجوئی زند گوازینگ ءُ زوراکیانی بگیری ءَ توار چست کنگ ءِ ھک دیگ بہ بیت۔
بنشون: درشان. اکس: مونوگرام
