بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ کراچی ءَ سی ٹی ڈی ءُ رینجر ءِ نیمگ ءَ سے ورنایانی بی ایل اے ءِ سرمچاری ءِ بھتام ءَ وتگڑیں دزگیری ءِ ٹاپار ایر جتگ ءُ گوشتگ کہ چہ اے وڑیں ردیں ٹاپاراں درکانودی دزگیری ءِ پہ نیمون کانودی لیکگ ءِ جھد ءَ کنگ ءَ اَنت۔
آئی ءَ گوشتگ کہ پانک ءَ اے ورنایانی ناشرکاری ءِ شکی کنگ ءُ مھلوک ءِ دیم ءَ پیش کنگ ءَ ساری ایشانی زوریں بیگواھی ءِ کیس شنگ کرتگ اَنت۔
پانک ءَ گوشتگ کہ زاھد بارکزھی ء مھمد نسیم کراچی، لیاری ءِ جاہ منند اِنت کہ 27 جنوری 2026 ءَ زور بیگواہ کنگ بوتگ۔ یاسر ارپاپ ء کادربکش مشکے، میانی کلات ءِ جاہ منند اِنت ءُ گومل یونیورسٹی ڈیرہ اسمائیل ءِ ھپتمی سمسٹر ءِ نودربرے، 2 پروری 2026 ءَ چہ ھب چوکی ءَ کراچی ءَ روگ ءَ بوتگ کہ آوار جنگ بوتگ۔ ھدابکش ء دلوش ھژدہ سالی نودربرے ءُ گڈانی ءِ جاہ منند اِنت، 2 پروری 2026 ءَ چہ کراچی ءَ زور بیگواہ کنگ بوتگ۔
آئی ءَ گوشتگ کہ چنچو ھپتگ اِنت آ چیریں آزار جاھاں بندیگ ءُ آزار دیگ ءَ پد آ ناشرکار پیش کنگ بوگ ءَ اَنت۔
پانک ءَ گوشتگ کہ اے وڑیں جیڑہ بلوچستان ءَ برجاھیں زوراکیاں پیش دار ایت کہ اود ءَ زوریں بیگواھی ءَ پد وتگڑیں بھتام جنگ ءُ درکانودی آوارجنیاں کانودی رنگ دیگ ءِ جھد ءَ کنگ ءَ اَنت۔
بنشون: درشان. اکس: پانک
