بلوچ وومن پورم ءِ سروک ڈاکٹر شلی بلوچ ءَ زوربیگواھیں گل مھمد مری ءِ مات اما ھوری ءِ بیرانی ءِ پژدر ءَ وتی درشان ءَ گوشتگ کہ اما ھوری پہ وتی گار ءُ بیگواھیں زھگ گل مھمد مری ءِ دیدارے ءَ تلوسگ ءَ اَت بلے آئی ءَ داں گڈی وھد ءَ وتی زھگ ءِ دیدار نسیب نہ بوت ءُ چہ اے دنیا ءَ رکست بوت۔
آئی ءَ گوشتگ کہ اماں ھوری بلوچ ءِ ھما شیرزال اَت کہ آئی ءَ وتی پیرزالی نہ چارت، اسلام آباد ءِ چوک ءَ ھور ءِ سر ءَ زھرشانی ءَ نندگ بہ بیت یا شال ءِ برپ بستگیں سارتی، آ ھمک وھد ءَ پہ وتی گار ءُ بیگواھیں زھگ ءِ آجوئی ءَ پریاد کنگ ءَ اَت۔
ڈاکٹر شلی بلوچ ءَ گوشتگ کہ اما ھوری ءَ پہ وتی پریاد ءِ سر کنگ ءَ کجام جاہ ءَ یک کسانیں اوستے بوتگ آئی ءَ وتی پریاد سر کتگ، چہ استان ءِ آمیدگساں بگر دانکہ دگانی سر ءَ زھرشانی کنگ، آئی ءَ ڈیھ ءِ ھمک در ٹک اِت اَنت۔ اے پیرزال ءِ چیھانٹ واجہ ھدا ءِ ارش ءَ سُرین اَنت، بلے اے ڈیھ ءِ واکداراں پہ آئی ءَ کمیں بزگ نہ بوت۔
آئی ءَ گوشتگ کہ چہ اے استان ءَ اماں ھوری ءِ ھما لوٹ ات اَنت کہ آیاں ڈیھ ءِ آئین ءُ کانود منّ اَنت۔ بلے آئی ءِ ارز ھچ جاہ گوش دارگ نہ بوت۔ اماں ھوری گوں ھمے رنجاں وتی زندگی ءِ سپر آسر کُت بلے آئی ءِ ھما ارز ءُ لوٹ استان ءَ ھوار پہ تیوگیں انسان دوستاں یک سوالے ءُ پشت کپتگ اَنت۔
بنشون: درشان. اکس: دامگ
