شال: بلوچ یکجھتی کمیٹی ءِ نیمگ ءَ برجاھیں مچی ءَ بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین ءَ تران کرتگ ءُ گوشتگ کہ اے ریاست ءِ بستار ھمیش اِنت پہ نزوریں جنینانی زھرشانی ءِ ھلاس کنگ ءَ زرگپتیں کشندھانی کمک ءَ زورگ ءَ اِنت۔
آئی ءَ گوشتگ کہ پہ مئے توار ءِ دارگ ءَ درسیں زور چکاسگ بوگ ءَ اَنت۔ چے بلوچ چکچینی ءِ ھلاسی، زوراکیانی درچ ءِ بند کنگ ءُ ھکانی دیگ ءِ لوٹ انچوش گراں اِنت کہ آ گیش ءُ گیوار کنگ مہ بیت۔ زوراکان ءَ سرپد بوگی اِنت کہ مردم نوں گیشتریں زوراکیاں اوپار کرت نہ کن اَنت۔
سمی دین ءَ گوشتگ کہ مئے لوٹ چے بوتگ اَنت کہ ریاست آیاں پیلو کرت مہ کنت؟ ما ھمے گوشتگ کہ زوریں بیگواھی ءُ درکانودی کوش بند کنگ بہ بیت۔ بلوچ ھم مردم لیکگ بہ بنت ءُ آیان ءَ مردمی ھک دیگ بہ بیت۔ ما گوں آیاں بس یک وڑ ءَ مردم بوگ ءِ ھک ءِ لوٹگ ءَ جھد کنگ ءَ ایں
آئی ءَ گوشتگ کہ بلوچانی مردم لیکگ انچوش گراں بوتگ ریاست ءِ لشکر، آمیدگس، واکدار ءُ رسانکدر درس مئے بگیری ءَ اوشتاتگ اَنت۔ درس ھمے چیز ءِ پیش دارگ ءِ جھد ءَ کنگ ءَ بوتگ اَنت کہ ما دری ڈیھانی کارمند ایں۔
سمی دین ءَ گوشتگ کہ ریاست ءَ ھمے درسیں زور پہ مئے جیڑہ ءِ گیش ءُ گیوار کنگ ءَ بہ جتیں مئے جیڑہ ھلاس بوتگ اَت، بلے آ انگت ءَ بلوچ ءِ مردم لیکگ ءَ جاڑیگ نہ اَنت۔ آ بلوچ ءِ زر ءُ مڈیاں ھر ھساب ءَ پلگ لوٹ اَنت اگاں بلوچ تباہ کنگ بہ بیت بلے بہ بیت۔
آئی ءَ گوشتگ کہ مرچی ھمک مردم ءِ یک نہ یک آزیزے الّم زوراکیانی آماچ بوتگ، بلے بلوچ ءِ درد ءَ تیوک ءَ بلوچ سرپد بہ بیت۔ انچوش کہ سداں سال پیش پہ یک سمی یے ءِ پھریزگ ءَ دودا وتی جان ءَ ندر کنت، مرچی پد ءَ یک سمی یے شمارا ھمے لوٹ ءَ کنگ ءَ اِنت بیا اِت مئے کمک ءَ بہ کن اِت۔
